Terrori i Edit dhe Kushtetuta e Likes!
nga Agim Popoci
Terrori që po demonstron Edi Rama në këtë kohë pandemie i tejkaloi të gjitha parashikimet e një diktatori, madje edhe të atyre kërcënuesve injorantë të protestës së 2 Marsit me në krye Presidentin e Republikës, Ilir Meta, që u betuan se nuk do ta lejojnë të preket Kushtetuta!
Ja që u prek, ja që u shkërmoq, ja që u degradua në atë pikë sa edhe kthimi në pikën zero është i parealizueshëm në rrugë ligjore, ashtu siç arriti ta ndryshoj Edi Rama me shumicën prej 2/3, që e krijoi me deputetët që tradhtuan Partinë Demokratike. Dhe jo vetëm në rrugë ligjore!
Degjenerimi që i bëri Edi Rama këtij populli në kohë pandemie, ndonëse ishte vetëm vijimësi e politikës së instaluar nga viti 2013, dëshmoi se nuk kemi të bëjmë vetëm me dhunti të Kryeministrit për të shtypur njerëzit me të dy këmbët, por që ky popull ende nuk i ka shpëtuar kthetrave të diktaturës.
Këtë e kuptoi Edi Rama dhe po vazhdon me qetësi olimpike ta përdhunon këtë popull në emër të Partisë, shumë më keq se gjyqet speciale që i organizonte paraardhësi i tij, krimineli Enver Hoxha.
Ky shpërdorim i situatës së pandemisë u bë problem në shumë shtete rrotull nesh e madje edhe në disa anëtare të BE, por në asnjërin prej tyre nuk rrinte Kryeministri në Facebook duke hartuar dhe korrigjuar Urdhra të hyrje-daljeve në shtëpi, ballkon e dritare. Në asnjërin prej këtyre shteteve Kryeministri nuk kërcënonte me të vdekur të Iranit dhe arkivole të Italisë. Në asnjërin prej këtyre shteteve, Kryeministri nuk tha se po të mos ishte ai do të kishin vdekur 18 mijë qytetarë, madje as në Kroaci ku Shtabi i Krizës u thoshte qytetarëve të mos dalin nga shtëpitë dhe tërmeti i fuqishëm i nxori jashtë! Shtabi i Krizës! Po, po, ose në ca prej tyre Mbrojtja Civile në emër të të cilave flisnin epidemiologët dhe infektologët dhe në asnjë rast Kryeministri. Dhe, ajo që çfarë është më e rëndësishmja, në asnjërin prej këtyre shteteve, nuk u cenua Kushtetuta ndonëse nuk organizuan as 2 Marsi dhe as nuk u zotua ndonjëri prej Presidentëve me protestues në krah!
Çfarë bëri ndërkohë ai që mori përsipër ta bëjë gardianin e Kushtetutës?!
Kur Edi Rama nxori ushtrinë në rrugë për të disiplinuar shqiptarët për të blerë bukë, domate dhe speca, gardiani i Kushtetutës me protestuesit e tij heshti.
Kur Edi Rama u akuzua se nuk po funksionon asgjë nga ato përrallat e tij shëndetësore duke përfshirë këtu edhe testet e mohuara për të infektuarit, gardiani i Kushtetutës me protestuesit e tij heshti.
Kur Edi Rama filloi ti kriminalizoj leje-daljet e njerëzve dhe makinave në baza partiake, dhe kjo u konfirmua me mijëra raste, gardiani i Kushtetutës me protestuesit e tij heshti.
Kur gardiani i Kushtetutës mori guximin dhe thirri Këshillin e Sigurisë Kombëtare dhe protestuesve të tij iu kthye qehrja, nga mbledhja, më i lumturi doli Edi Rama. Aq i lumtur ishte sa organizoi edhe mbledhjen e dytë ndonëse u thirre nga Likja, për tu mburrur me harmoninë që gëzojnë Kryeministri me Presidentin. Vërtetë mbresëlënëse madje edhe për popullin që Likja kishte në krah për mbrojtjen e Kushtetutës.
Dhe, në fund, kur Edi Rama nxori dhëmbët dhe futi duart edhe në Kodin Penal, për të frikësuar ata që nuk trembeshin nga arkivolet e Bergamos dhe xhenazet e Hassan Rouhanit, se do ti arrestonte po qe se nuk e dëgjojnë pronarin e kësaj Shqipërie, që tashmë po legalizon atë tokë të cilën në vitin 2013 e pagëzoi “tokë e xanun”; Sërish atij që i hante meraku për Kushtetutën dhe që për fatkeqësinë e këtij popullit është President i Republikës, heshti!
E meqë të gjithë heshtën dhe po heshtin, terrorin Edi Rama e stolisi edhe me tallje. Sapo lëshoi Urdhrin për karantinë deri të hënën, në darkën e Surrelit u kujtua se ka dhe popull ky vend. Vendosi ti lë të dalin ata pleq që i kishte terrorizuar për më shumë se një muaj. U ulë në poltronin e tij dhe iu përvesh Facebookut.
Kërciti ekzaltimi i moshës së tretë por jo ndonjë ankesë, as sporadike, pse ky vazhdon e tallet edhe me ato që sapo kishte miratuar. Fali gjobat antiligjore që nuk e vrante mendjen njeri nëse kishin lidhje me Kushtetutën e Likes ose jo! Largqoftë për të protestuar! Kohë pandemie thoshin me zë, ndërsa nën zë nuk guxuan të komentojnë as vendimin e Gjykatës Kushtetuese të Gjermanisë se është antiligjore mohimi i protestës qoftë edhe në kohë koronavirusi!
Madje mungoi reagimi kur u konfirmua se sejmenët e Edi Ramës, siç konfirmoi Ish-Deputeti Bardh Spahia, kishin fshehur edhe njëriun e vdekur në Shkodër për shkak të statistikës zyrtare për pandeminë. Partia dha urdhër për heshtje! Likes nuk ishte e qartë kush i dha urdhër të heshtë ashtu si dhe protestuesve të tij, që përveç se heshtin, nuk e bëjnë dot as shqiponjën e lëre më më të ndezin dritat e celularëve.
E meqë terrori demokratik shqiptar tashmë me metastaza po funksionon, Edi Rama u kujtua të vazhdoj spektaklin. I dha leje-dalje grave me fëmijë deri në 10 vjeç! Ama jo me shoqe, sade, kështu e tha i zoti i vendit. Pasi e publikoi në Facebook, jo që u ankua njeri po vetë mendoi ta zbuluroi edhe me një shtesë të Urdhrit të dhënë një ditë më parë.
Pasi koronavirusi u urdhërua të largohet deri në orën 11:00 nga “toka e xanun” nga Edi Rama, plasën nënat me kalamaj në rrugë, pa teklif nga pandemia. U lumturua Kryeministri, u mallëngjye nga pamjet me fëmijë që i kalbi me terrorin e tij, dhe paralajmëroi në të ardhmen fundjavë pa makina në Tiranën e pastër.
Ky, po ky që Kushtetuta e Likes nuk i thotë asgjë më shumë se Kryeministër, por kur del nga Kulla e Surrelit harbohet dhe merr gjithçka që i del para, duke filluar nga i biri Zaho e deri te Forcat e Armatosura edhe pse Komandant i Përgjithshëm është Presidenti i Republikës.
Sot kur terrori i Edi Ramës nuk po ndalon dot, kur Kushtetuta e Likes nuk i hynë në punë as mikut dhe as armikut e ai me protestuesit e tij heshtin, dhe, kthimi në pikën zero në mënyrë ligjore është i pamundur, jo gjithçka është e pashpresë.
Nëse shqiptarët janë dakord të jetojnë të nënshtruar nga një rrugaç me penel në dorë, askush nuk i ndalon! Por, nëse duan të jetojnë si njerëz normal, shembujt janë të shumtë; Për t’ia lehtësuar vetes dhe për të kursyer kohë, në mënyrë që ta bëjnë njëherë e mirë këtë punë, kanë shembullin rumun.
Nga ajo tokë iku një herë e mirë kërma e kuqe, dhe sot me raste edhe nxjerr kokën, por kurr nuk i vete mendja më për të vrarë.
