Johnson dhe Trump diskutojnë rreth luftës kundër koronavirusit

Kryeministri britanik, Boris Johnson, ka zhvilluar një bisedë telefonike me presidentin amerikan, Donald Trump, ku u është diskutuar bashkëpunimi Britani- SHBA, në luftën kundër pandemisë me koronavirus, dhe kanë arritur pajtueshmëri për përgjigjen e koordinuar ndërkombëtare.

Boris Johnson, që aktualisht gjendet në rezidencën e tij shtetërore teksa vazhdon trajtimin e tij kundër koronavirusit, pritet që të flasë edhe me Mbretëreshën Elizabeta II gjatë kësaj jave.

Zëdhënësit qeveritarë janë shprehur se kryeministri britanik aktualisht nuk është duke marrë pjesë në procedura zyrtare të qeverisë, raporton RFE, mirëpo është duke pranuar përditësimet e fundit nga zyrtarë të lartë.

Ndryshe, si pasojë e koronavirusit të ri, në gjithë botën janë infektuar rreth 2.5 milionë njerëz ndërkohë mbi 170.000 kanë vdekur.