SHBA miraton ilaçin për trajtimin e koronavirusit

Administrata amerikane për Ushqim dhe Ilaçe ka miratuar një ilaç që mund të përdoret për trajtimin e koronavirusit të ri, tha Presidenti i SHBA, Donald Trump.

Presidenti Trump tha se udhëheqësi i kompanisë Gilead, që ka zhvilluar ilaçin, e ka përshkruar këtë hap si shumë të rëndësishëm ndërsa bëri të ditur se do të dhurojë një milion shishe të ilaçit, remdesivir.

Zv/Presidenti amerikan, Mike Pence, tha se shpërndarja e këtij ilaçi në spitale do të fillojë të hënën.

Ky ilaç, raporton RFE, që fillimisht është krijuar për trajtim të sëmundjes Ebola, ka zvogëluar ditët e shfaqjes së simptomave të koronavirusit nga 15 në 11, në disa teste që janë bërë ku janë përfshirë spitale nga e gjithë bota.

Megjithatë një studim kinez ka vënë në pikëpyetje dobinë e këtij ilaçi.

Shtetet e Bashkuara janë prekur më së keqi në botë nga sëmundja COVID-19 me mbi 1 milion të infektuar dhe mbi 60.000 persona të vdekur.