Pas Gjykatës Kushtetuese, Kryeministri Kurti i drejtohet Komisionit të Venecias
Përveç Gjykatës Kushtetuese të Kosovës, Kryeministri në detyrë Albin Kurti, më 1 maj i është drejtuar edhe Komisionit të Venecias duke i kërkuar opinion lidhur me kompetencat e Presidentit të Kosovës në shpërndarjen e Parlamentit dhe në kompetencat e tij për propozimin e mandatarit për Kryeministër pas mocionit të mosbesimit, njofton Zyra e Kryeministrit të Kosovës.
“Në linjë me situatën e krijuar në Kosovë, një opinion nga Komisioni i Venecias do të shërbente në forcimin e demokracisë dhe të së drejtës kushtetuese. Gjithashtu, një vlerësim nga Komisioni do të kishte vlerë substanciale jo vetëm për Kosovën, por gjithashtu në mënyrë më të përgjithshme edhe për praktikën kushtetuese në të gjitha shtetet anëtare në Komision”, thuhet në komunikatën për medie të Zyrës së Kryeministrit të Kosovës.
Kjo është hera e parë që Kosova kërkon opinion nga Komisionin e Venecias në lidhje me raportin e institucioneve kushtetuese dhe kompetencat e tyre.
Dje, Gjykata Kushtetuese në Kosovë ka vendosur në favor të kërkesës së Lëvizjes Vetëvendosje për të pezulluar zbatimin e dekretit të presidentit Hashim Thaçi deri më 29 maj, derisa të shqyrtojë lëndën e dërguar nga kjo parti, lidhur me kushtetutshmërinë e vendimit të presidentit.
Ndryshe, më 30 prill, Presidenti i Kosovës, Hashim Thaçi ka dekretuar kandidatin e Lidhjes Demokratike të Kosovës, Avdullah Hoti, për pozitën e kryeministrit të ardhshëm të Kosovës. Pas lëshimit të këtij dekreti, Lëvizja Vetëvendosje i është drejtuar Gjykatës Kushtetuese me pretendimin se presidenti ka marrë një vendim antikushtetues.
