Plani i Masave, deri më 1 Qershor: Ja si do punojnë klinikat dentare, parukeritë, qendrat tregtare…
Duke prezantuar Planin e Masave deri më 1 Qershor, Ministrja e Shëndetësisë, Ogerta Manastirliu, tha se plani i qeverisë për rihapjen po shkon sipas parashikimit ndërsa u mburrë se 70 për qind e të infektuarve janë shëruar dhe prej 10 ditësh Shqipëria nuk shënon asnjë humbje jete nga COVID-19.
”Plani i rihapjes sipas parashikimit. Numri i të shëruarve ka shkaur në mbi 70% të atyre të infektuarve të konfirmuar. Sot kemi 199 qytetarë të infektuar aktivë. Prej 10 ditësh s’kemi humbje jete. ”
Në këtë situatë, Ministrja e Shëndetësisë, Ogerta Manastirliu, sot bëri të ditur se ka firmosur Urdhrin i cili lejon duke filluar nga 11 Maji që të ushtrojnë veprimtarinë e tyre, parukeritë, berberët, qendrat tregtare apo klinika dentare me orarin rej 08:00 deri në 17:30.
Në urdhrin e ministrisë, thuhet se këto shërbime do kryhen duke respektuar protokollet e sigurisë të miratuara nga Instituti i Shëndetit Publik.
“Nga data 11 Maj lejohen të ushtrojnë veprimtari sipas protokolleve strikte të sigurisë, me të cilat bizneset janë njohur përgjatë kësaj kohe, aktivitetet si më poshtë, klinikat dentare, parukeri, berber dhe dyqanet në qendrat tregëtare. Theksojmë se është shumë I rëndësishëm zbatimi I distancimit fizik dhe kushteve të higjenës në këto aktivitete biznesi, ku ashtu sic po realizohet në vijimësi, task forca do të vijojë kontrollin për zbatimi e protokolleve të sigurisë”, tha ministrja sot.
Duke filluar nga 18 Maji, ministrja Manastirliu tha se do të hapen muzetë, galeritë e arteve dhe sitet arkeologjike nën masa të rrepta, ashtu si bare dhe restorante vetëm në ambientet e jashtme deri në orën 17:30.
“Në vijim të Planit të rihapjes, nëse do të vijojmë të kemi tregues të qëndrueshëm, sa i përket rasteve aktive ditore, numrit të shtruarve në spitale, pacientëve në terapi intensive, kemi planifikuar që prej datës 18 Maj:
Do të fillojë zhvillimi i procesit mësimor dhe provimeve të maturës shtetërore sipas udhëzimeve dhe protokolleve të miratuara nga Ministria e Shëndetësise.
Po në këtë datë planifikojmë të hapen njësitë e shërbimit, bare dhe restorante vetëm në ambientet e jashtme deri në orën 17:30.
Duke filluar nga data 18 Maj shtohen fluturimet e riatdhesimit, me detyrimin për vetekarantiim në banesë.
Prej dates 18 Maj planifikohet të hapen nën rregulla rigoroze, muzetë, galeritë e arteve dhe sitet arkeologjike sipas protokolleve dhe udhëzimeve të miratuara.
Nga data 18 Maj do të lejohen me protokolle dhe masa sigurie dhe stërvitjet individuale të sportistëve në ambiente të hapura.
Do të vijojnë të jenë të ndaluara aktivitetet kulturore dhe sportive në ambientet e hapura dhe të mbyllura,” tha Ministrja e Shëndetësisë, Ogerta Manastirliu duke përsëritur edhe sot se do të vijojë të mbetet në fuqi ndalimi i grumbullimeve me shumë se pesë personave në ambientet publike si dhe do të mbetet i mbyllur dhe transporti publik.
Nëse të dhënat do të jenë të qendrueshme, bazuar në kriteret e përcaktuara nga Komiteti Teknik, Manastirliu tha se nga data 1 qershor po planifikohet të lejohet hapja e çerdheve dhe e kopshteve publike dhe private.
“Dëshiroj të ndalem këtu, duke theksuar nevojën e një vlerësimi të thellë dhe shumë të kujdesshem të kushteve higjeno-sanitare për çdo strukture të kopshteve dhe çerdheve dhe standardeve që duhet të plotësojnë për të mirëpritur fëmijët në këto institucione me rregullat e reja. Protokollet e sigurisë do të bëhen të njohura në ditët në vijim, ku dhe do të ngarkohen për zbatim të gjithë insitucionet përgjegjëse për plotësimin e tyre deri në këtë datë.”
