Nga e hëna, Edi Rama: Do të hapet gjithçka, përveç…

Kryeministri Edi Rama tha se nga dita e hënë gjithçka do të jetë e hapur, përveç aktiviteteve sportive e kulturore, transportit publik dhe bareve, klubeve e restoranteve në mjedise të mbyllura. Ashtu sikur se ministrja e Shëndetësisë, Ogerta Manastirliu, edhe Edi Rama tha se vendi ndodhet në një situatë mjaft delikate të hapjes, ku edhe rreziku i përhapjes së koronavirusit është më i madh.

“Duhet të flasim për një moment mjaft delikat, ku po hapemi dhe ekspozohemi cdo ditë e më shumë rrezikut. Siç e keni parë nga inforamcionet e Ministrisë së Shëndetësisë, sot edhe ministrja u detyrua të dalë në konferencën e përditshme pikërisht për të lëshuar një mesazh të shkurtër dhe të qartë, që numrat po lëvizin. Jemi të vetëdijshëm që numrat lëvizin, por lëvizaja e numrave, nëse do të vazhdojë te jetë kështu, do të jetë problem,” tha Edi Rama duke përsëritur se në këtë fazë secili prej nesh është vendimtar.

“Sjellja në raport me rregullat është decizive. Patriotizmi sot është të mos shkelen rregullat, me idenë se s’do më kapin, nuk është gjë. Dua ta përsëris se vazhdoj të dëgjoj sojin e papërgjegjshëm që kjo është kot, s’ka asgjë. Këto broçkulla ju lutem t’i lëmë dhe të fokusohemi te shkenca, t’i referohemi burimeve zyrtare. Nuk duhet të merremi me llafe. Ne nga e hëna, përveç transportit publik, aktiviteteve sportive e kulturore, bare, restorane e klube nate në mjedise të mbyllura, në mjedise të mbyllura, nuk do të kemi asgjë tjetër të mbyllur.”

Nëse shifrat me koronavirusin nuk dalin jashtë kontrollit, Kryeministri Edi Rama kishte lajm të mirë për shqiptarët e mbetur në Greqi.

“Nëse shifrat përmirësohen, do hapim kufijtë e do të vini në Shqipëri. Nuk duam të mbajmë askënd larg, por kushtet na kanë imponuar këtë situatë. Ndërkohë, ata që kanë kaluar 3 mujorëshin, nuk janë penalizuar, falë edhe faktit se kam biseduar me homologun tim grek,” tha Rama i bindur se vetëm vetëdija e qytetarëve mund të na shpëtojë.

“Dalja nga liqeni ishte problem mbrëmë. U shkarkua shefi i Komisariatit numër 1 mbrëmë dhe u paralajmërua shefi i Komisariatit numër 2. Unë iu bëj thirrje të gjithë shefave të komisariateve te policëve që të kenë kujdes. Të respektohen masat një më një. Sjellja ka teper rendesi. Në të gjithë botën kështu thuhet. Në këtë fazë vetëdija e qytetarëve vendos fatin e luftës. Të gjithë duan të hapemi, ama është përgjegjësi e madhe për të balancuar hapjen graduale me mbrojtjen e secilit psikologjikisht.”

Në gallatën e tij buzëmbrëmjes covidiane, Edi Rama foli edhe për mundësinë e mbajtjes së dasmave.

“Më vjen keq, por nuk mund të ketë dasma në këtë fazë. Në këtë fazë as dreka e darka me shumë vetë nuk mund të ketë. Kjo sepse shumë veta në një vend janë një problem. Prandaj, nuk do të ketë dasma e evente pa mbaruar kjo luftë me koronavirusin.”

Plazhi, pa shezllone e salltanete!

Ky vit, sipas Kryeministrit Edi Rama, do të jetë viti i turizmit të shqiptarëve pasi qeveria po përpiqet të hapë të gjitha rrugët për bashkëkombasit kudo që jetojnë ata. Por nuk harroi tu thotë shqiptarëve dhe jo vetëm se këtë vit do ketë limite dhe me protokolle sigurie shëndetësore prandaj edhe shqiptarët teksa sot flasin për Suedinë nesër do të duhet të sillen si suedezë me rregullat.

”Linjat ajrore janë të mbyllura. Kemi një koridor ajror me Air Albania, sa hapet aplikimi rezervohen menjëherë.

Europa ka thënë që do hapen më 15 qershor, kurse disa vende do i hapin më herët. Ne do i shohim dhe duam t’i qëndrojmë objektivit që brenda majit të hapim të gjitha rrugët ajrore për gjithë shqiptarët kudo që jetojnë, edhe në funksion të turizmit.

Këtë vit do jetë turizmi i shqiptarëve. Shqiptarët nuk do të kujtohen për Suedinë, dhe thonë se ja si nuk u mbyll Suedia, por do të sillen si suedezë për rregullat.”

Por shqiptarët që duhet të sllen si suedez Kryeministrin do të vazhdojnë ta kenë shqiptarë jo vetëm me emër. Me fjalorin e vitit 1812, Edi Rama ju flet shqiptarëve në vitin 2020 për “tokën e xanun” dhe tokën publike që do ta kenë me bollëk.

”Plazhet këtë vit do jenë shumë më tepër publike se privat. Do jemi shumë striktë me këtë. Kjo e keqja do vijë me të mirën që do ketë shumë më tepër hapësirë pa ju dalë njëri që kjo është tokë e xanun, rronte stërgjyshi im, mbillte qepë e domate dhe kur erdhi komunizmi na i mori prandaj t’i do më japësh lekët. Do ketë më shumë hapësirë,” tha sot Kryeministri Edi Rama për një çështje që nuk e ekziston nga viti 2013 sepse me ardhjen në pushtet të rilindjes grabitja e palzhit publik ishte ekskluzivitet i kryebashkiakëve socialist të cilët, duke marr shembull nga Gjushi i Durrësit nuk lanë as edhe 1 cm plazh publik.

Gjithsesi, shqiptarët kanë dhe arsye ti besojnë Kryeministri Edi Rama kur premtoi sot se do të ketë plazhe publike, jo se ky njeri shqetësohet për publikun, por jemi në vitin e fundit të mandatit të dytë qeverisës:

“Aty ku ka plazhe shumë të populluara do gjejmë zgjidhje të balancuar por do favorizojmë plazhe publike dhe plazhe si dikur, pa shezllone dhe salltanetet e mëdha. Me diell, me rërë, me çadër.”