Tajlanda po teston në majmunë, një vaksinë për koronavirus

Tajlanda ka nisur testimin e një vaksine për koronavirus në majmunë pas rezultateve pozitive në minj, ka njoftuar Ministri tajlandez për Edukim të Lartë dhe Hulumtime, Suvit Maesincee.

Maesincee, raporton RFE, tha se hulumtuesit shpresojnë se do të kenë më shumë të dhëna rreth efektit të vaksinës, deri në muajin shtator.

“Ky projekt është për racën njerëzore, jo vetëm tajlandezët. Kryeministri Prayuth Chan-ocha ka theksuar politikën se ne duhet ta zbulojmë vaksinën dhe t’i bashkohemi komunitetit që po punon në këtë drejtim,” tha Suvit sot para gazetarëve.

Për vaksinën tajlandeze është përdorur acid ribonukleik, i cili shtyn qelizat e njeriut që të prodhojnë antigjene, të cilat e aktivizojnë sistemin imunitar.

Kjo vaksinë është një prej të paktën 100 tjerave për të cilat po punohet në botë kundër sëmundjes COVID-19, që shkakton koronavirusi.