Shuhet Qerim Sula!

Shuhet mjeshtri i këngës dibrane, Qerim Sula. Këngëtari i këngëve epike dhe traditës u nda nga jeta në moshën 69-vjeçare pas problemeve me zemrën.

Mësohet se Qerim Sula ishte shtruar prej një muaji në spital, por nuk arriti ta mposhtë sëmundjen.

Kush ishte Qerim Sula?! Që në moshë të re u aktivizua me grupet amatore të Zalldardhës, ndërsa në vitin 1967 me ansamblin “Dibra”.

Një vit më pas, më 1968 bën prezantimin e parë në Festivalin e Parë Folklorik të Gjirokastrës me këngën e Hazis Ndreut, “Kënga e Lam Dacit”, ku u vlerësua me çmim të parë për interpretimin e tij. Ka marrë pjesë në të gjitha Festivalet Folklorike deri deri në vitin 2000.

Ai është aktivizuar në mjaft trupa e ansamble, si dhe ka qenë pjesëtar i Estradës Profesioniste të Peshkopisë. Ka kënduar në shumë skena të vendit por edhe jashtë shtetit, si në Gjermani, Austri, Turqi, Belgjikë, etj.

Në vitin 1981 ishte në Kosovë me ansamblin “Kuksi i ri”.

Në repertorin e tij ka një numër të madh këngësh epike, duke qenë nga këngëtarët më të suksesshëm të trevës së veriut, i vlerësuar me mjaft çmime e diploma të ndryshme, në aktivitet kombëtare. Ka realizuar dy albume me këngë dibrane.

Amaneti i tij i fundit ishte:

Më varrosni në Zall-Dardhë, aty ku linda.