Vetëvendosje: Koha e zgjedhjeve po afron!

Kryetari i Lëvizjes Vetëvendosje, Albin Kurti ka vizituar sot komunat e Drenasit, Dardanës e Gjilan, ku takoi aktivistët nëpër tenda dhe qytetarët nënshkrues të peticionit për zgjedhje.

Sipas Lëvizjes Vetëvendosje, entuziazmi për zgjedhje të reja në Drenas, Dardanë e Gjilan është i lartë në këto ditë të nxehta qershori dhe kjo nuk ka të bëjë vetëm me rritjen e numrit të nënshkrimeve në peticion.

“Nëpër takimet tona, e sidomos në këto tri të fundit me qytetarë, hetohet dëshira e nevoja për një qeveri të mirë, e jo një qeveri koti. Për një qeverisje që jep ndjenjën e sigurisë dhe zhvillimit, e jo të shantazhit, e të presidentit, ” thuhet në njoftimin e Lëvizjes Vetëvendosje duke shtuar se Kryetari Kurti vizitoi këto qytete, ku takoi aktivistët punëtorë nëpër tenda dhe qytetarët nënshkrues të peticionit më të madh ndonjëherë ndërsa përfundon:

“Koha e zgjedhjeve po afron e puna jonë do të shtohet në ditët e radhës. Rikthimi ynë do të jetë edhe më i fuqishëm, sepse nuk do të jetë vetëm rikthim i yni, por edhe i vetë popullit në qeverisje.”