Interpelancë/ “Krim i mëshirshëm”, po ekziston! Ja dëgjoni Ministrin Lleshaj!

Për të kuptuar situatën e kriminalitetit në Shqipëri nuk të duhen më as statistikat dhe as shqetësimet e ngritura nga një grup deputetësh që kërkuan interpelancë urgjente me ministrin e Brendshëm, Ish-Gjeneral Sandër Lleshaj! Mjafton të dëgjohet fjala e këtij të fundit në Parlamentin e Shqipërisë për të kuptuar se situata me krimin, jo mirë por është shumë mirë, kur një njeri i tillë është ministër.

Me këtë fjalë të mbajtur në Parlament, Shqipëria mund të renditet si vendi i parë ku krimi ka mëshirë dhe jo siç thotë Ish-Gjeneral Lleshaj ka pësuar rënie, madje duke fajësuar dhe mediat se e fryjnë situatën.

“Shqipëria është afër mesatares së vendeve të BE për sa i përket situatës nga kriminaliteti. Disa media e vizatojnë situatën në një mënyrë shumë të errët. Nëse i referohemi disa mediave, i bie që në mos të vijmë këtu fare. Por, e refuzoj faktin që në Shqipëri ka rritje krimi. Në Shqipëri do të ketë ulje kriminaliteti për sa kohë qeverisim ne. Sot media ka kushdo, madje edhe krimi ka media. Në konkluzionet që arrini për Shqipërinë, të keni kujdes sepse vendi ynë nuk është aq e errët sa bëhet nga disa media, që ndoshta kanë interes për ta bërë këtë punë. Policia po bën të mundur rritjen e sigurisë kudo në vend,” tha ministri i Brendshëm dhe për të gjithë shqiptarët që nuk e kanë të qartë se pse ekziston OFL dhe pse shkel Ligjin siç konstatoi SPAK, sot Ish-Gjeneral Lleshaj tha të kundërtën, se ka sekuestruar shumë pasuri që janë vendosur në mënyrë të paligjshme.

“SPAK ka nisur hetimet e saj, që ka vënë në sekuestro disa pasuri, që dikur ishin  në duart e krimit. Krimi i organizuar është model suksesi e ky sukses i tillë duhet që të përfundojë.  Pasuria përmes krimit do të goditet. Instrumentet tashmë janë të tilla, që sekuestron pasuritë kriminale. Lufta ndaj mbjelljes së kanabisit është zhvilluar në atë mënyrë, sa ka sukses tashmë të matshëm e të certifikuar tani. Kjo bëhet në kohën që Shqipëria po hap negociatat dhe vijon procesin integrues për në BE. Kemi shtuar kapacitetet tona. Është shtuar hetimi pro aktiv. Disa grupe, që mund të jenë edhe kriminale kanë nxitur qytetarët të merren me veprimtari kriminale të mbjelljes së hashashit.”

E meqë doli në foltore, ai dhe kërcënoi:

“Gjej rastin që kryepleqtë, bashkitë, të gjithë zyrtarët vendor të kenë kujdes të vazhdueshëm, sepse dështimi në këtë fushë, do të ketë pasoja të rënda penale për të gjithë zyrtarët që kanë detyrim për kontrollin e territorit. Edhe sasia e kanabisit që ka shkuar në Itali e në Greqi është në rënie. Janë mbi 1700 kg lëndë narkotike të kapura nga Shqipëria në Puglia.”

Dhe, duke ngatërruar republikën e Saliut me ato të Saime Qorrit ndërsa iu drejtua një deputeti që vjen nga listat e PD, Ish-Gjeneral Sandër Lleshaj shtoi:

“Duken shumë, por ka pasur kohë kur keni krijuar Republikë Kanabisi. Me Lazaratin tuaj keni nxirë faqen, kurse ne kemi arritur në minimume historike. Kemi minus 50 për qind krime në vend!”

Në fund, me këtë ministër të Brendshëm dhe policinë që kemi bie dhe toria e “krimit të pamëshirshëm” sepse ai tashmë në vendin tonë nuk futet vetëm ku ai nuk don! Sikur krimi do të ishte i pamëshirshëm në Shqipëri, ai do të bënte namin sepse nuk ka se kush ta ndalon.

Shifrat që raportoi ministri dhe konstatimet, nuk përkojnë me realitetin si me atë aktual ashtu dhe se atë të kohës së Saliut.