Sot shqitarët e Luginës bashkë, për tri ulëse në Parlamentin e Serbisë
Pesë partitë politike shqiptare në Luginën e Preshevës sot marrin pjesë në zgjedhjet parlamentare të Serbisë, me një listë të përbashkët zgjedhore.
Partia për Veprim Demokratik, Alternativa për Ndryshime, Lëvizja për Progresin Demokratik, Lëvizja për Reforma e Partisë Demokratike Shqiptare dhe Partia Demokratike, janë angazhuar që sot në garë, në Preshevë, Medvegjë e Bujanoc, të fitojnë të paktën tri ulëse në Parlamentin e Serbisë.
Kryetari i komunës së Bujanocit nga radhët e Partisë për Veprim Demokratik, Shaip Kamberi, tha se pjesëmarrja e shqiptarëve në zgjedhje ka për qëllim fuqizimin e shqiptarëve në aspektin politik.
“Ne synojmë pra arritjen e tri mandateve meqë kësaj here për herë të parë janë pesë partitë kryesore të angazhuar në një listë të përbashkët. Kjo e jep mundësinë që realisht mendojmë se do të arrijmë të sigurojmë tri mandate,” tha Shaip Kamberi duke shtuar se synimi i partive politike është që të zgjidhen të gjitha problemet e shqiptarëve.
“Synimi ynë është qeveria në Beograd t’i konsiderojë partitë politike shqiptare në Luginë të Preshevës partner për t’i zgjidhur ato probleme për të cilat me vite të tëra nuk ka pasur zgjidhje. Megjithatë synimi ynë esencial politik është që të arrijmë që në bisedimet që duhet të zhvillohen mes Kosovës dhe Serbisë, Lugina e Preshevës të jetë një nder temat të cilat do të diskutohen, pra një teme e cila kërkon zgjidhje të drejtpërdrejt dhe emergjente.”
Ndërsa Kryetari i Këshillit Kombëtar Shqiptar në Luginën e Preshevës, Ragmi Mustafa, tha se aktualisht është shumë e rëndësishme që në këtë kohë faktori shqiptar të jetë i unifikuar.
“Pretendimi është që me ketë listë shqiptare të Luginës së Preshevës të kenë më shumë përfaqësues në parlamentin republikan të Serbisë, atje ku do të mund të dëgjohet edhe me shumë zëri i shqiptarëve të Luginës së Preshevës duke shpjeguar dhe dhënë informacione të sakta sa i përket problemeve dhe sfidat me të cilat përballen shqiptarët,” tha Ragmi Mustafa.
Ndryshe, Komisioni Qendror i Zgjedhjeve i Serbisë ka konfirmuar zyrtarisht listën me 6.584.376 votues për zgjedhjet parlamentare të 21 Qershorit. Ndërkohë numri i saktë i shqiptarëve ende nuk dihet pasi ata kanë bojkotuar regjistrimin e fundit të popullsisë në Serbi, në vitin 2011.
