Rusi, sot parada e fitores!

Sot Rusia shënon Ditën e Fitores me një paradë ushtarake, e cila tradicionalisht mbahet më 9 maj, por është shtyrë për shkak të pandemisë së koronavirusit.

Sivjet janë bërë saktësisht 75 vjet nga fitorja e Bashkimit Sovjetik ndaj Gjermanisë naziste në Luftën e Dytë Botërore.

Izolimi në Moskë, për shkak të koronavirusit, është lehtësuar këtë muaj, duke i hapur rrugë edhe organizimit të paradës, ku pritet të shfaqen tanke dhe raketa me rreze të gjatë veprimi.

Për presidentin rus, Vladimir Putin, kjo ngjarje është veçanërisht e rëndësishme këtë vit, pasi mbahet para referendumit të 1 korrikut mbi ndryshimet kushtetuese, që do t’i mundësonin atij mbetjen në pushtet deri në vitin 2036.

Edhe ky referendum ka qenë i planifikuar për 22 prill, por është shtyrë për shkak të pandemisë.

Rusia ka konfirmuar mbi 600.000 raste me koronavirus dhe mbi 8,000 viktima, edhe pse këto shifra besohet të jenë shumë më të larta. Dhe, raporton RFE, Organizatorët e paradës kanë marrë parasysh rreziqet nga virusi.

Veteranët rusë të Luftës së Dytë Botërore, që do të shikojnë paradën, do të vendosen në një vend të veçantë dhe larg njëri-tjetrit. Ushtarët që marrin pjesë në paradë janë vendosur në karantinë gjatë provave dhe janë testuar.

Ndërkaq, udhëheqësit tjerë huaj që do të marrin pjesë përkundër rrezikut nga koronavirusi, është parashikuar të qëndrojnë larg njëri tjetrit.

Presidenti i Francës, i Çekisë, i Kroacisë dhe i Kinës kanë thënë më herët se planifikojnë të ndjekin paradën, por i kanë anuluar udhëtimet pasi ajo ëstë shtyrë për 24 qershor.

Presidenti i Bjellorusisë, i Kazakistanit, i Kirgizisë, i Moldavisë, i Serbisë, i Taxhikistanit dhe i Uzbekistanit pritet të jenë të pranishëm në paradë.