Para Kongresit, Fauci: Javët e ardhshme, kritike për frenimin e koronavirusit

Zyrtarë të shëndetit publik në Shtetet e Bashkuara thanë se ka një tendencë shqetësuese të rritjes së rasteve me koronavirus. Drejtori i Institutit Kombëtar për Alergji dhe Sëmundje Infektive, Anthony Fauci, tha përpara një komiteti të Kongresit amerikan se javët e ardhshme do të jenë kritike për të frenuar numrin e të infektuarve.

Anthony Fauci tha se Teksasi, Arizona, Florida si dhe shtete të tjera janë probleme serioze.

Numri ditor i rasteve të reja në SHBA, raporton RFE, aktualisht qëndron në rreth 30,000, pasi më herët ka rënë në rreth 20000.

”Kjo është shumë shqetësuese për mua,” tha Fauci, duke iu bërë thirrje njerëzve që t’i shmangin turmat dhe të vendosin maska. Madje, sipas tij, Shtetet e Bashkuara janë ende në mes të valës së parë të sëmundjes.

Autoritetet në SHBA kanë konfirmuar mbi 2.3 milionë raste me koronavirus dhe mbi 121.000 viktima – më së shumti në botë.

Në aspektin global, numri i të infektuarve ka arritur në mbi 9.2 milionë. Prej tyre, mbi 4.6 milionë janë shëruar dhe mbi 477.000 kanë vdekur.

Ekspertët e shëndetit thonë se koronavirusi nuk ka gjasa të mposhtet derisa të zhvillohet vaksina.

Fauci tha se është optimist i kujdesshëm se disa vaksina mund të jenë në dispozicion në fund të vitit.