Pas takimit me Hotin, Rama: Shqipëria do t’i qëndrojë gjithmonë pranë Kosovës!

Kryeministri i Shqipërisë, Edi Rama, i cili po qëndron për një vizitë dyditore në Kosovë sot u takua me homologun e tij kosovar Avdullah Hoti i cili e falënderoi kryeministrin Rama për mbështetjen e përhershme që Shqipëria i ka dhënë Kosovës.

Duke theksuar se Kosova dhe Shqipëria i kanë të gjitha mundësitë që ta thellojnë bashkëpunimin edhe më tej, kryeministri Hoti tha se Qeveria e Kosovës e konsideron natyrshëm Shqipërinë si partnerin më të afërt dhe strategjik në procesin e realizimit të synimeve integruese euroatlantike.

“Ne jemi të vendosur ta vazhdojmë procesin e dialogut me Serbinë, me qëllim të arrijmë një marrëveshje të përhershme paqeje e stabiliteti, e cila do të rezultojë me njohjen e ndërsjellë në mes dy vendeve,” tha kryeministri Hoti dhe pavarësisht rrethanave dhe vështirësive që mund të dalin gjatë procesit, Qeveria e Kosovës është e përkushtuar që ta zhvillojë agjendën e saj të integrimeve euroatlantike.

Ndërsa, kryeministri i Shqipërisë, Edi Rama, ofroi mbështetjen e plotë të qeverisë shqiptare për institucionet dhe popullin e Kosovës.

“Shqipëria i ka qëndruar dhe do t’i qëndrojë gjithmonë pranë Kosovës”, tha Kryeministri Rama, duke theksuar se edhe në të ardhmen, Shqipëria do ta ndihmojë Kosovën në të gjitha proceset.

Në fund të këtij takimi, kryeministri Edi Rama e ftoi kryeministrin Hoti për një vizitë zyrtare në Shqipëri, e cila pritet të realizohet këtë të premte, më 3 korrik 2020.

Ndryshe, sot në ditën e parë të vizitës, Edi Rama takoi edhe Presidentin Hashim Thaçi, Kryetaren e Parlamentit, Vjosa Osmani, Kryetarin e Lëvizjes Vetëvendosje, Albin Kurti, atë të NISMA, Fatmir Limaj por jo dhe kryetarin e AAK, Ramush Haradinaj i cili refuzoi ta takoj Kryeministrin e Shqipërisë me të cilin po shikohen përmes fengjive të drejtësisë.