Përgjigjet Opozita e Bashkuar, PS: Këshilli Politik mbahet të hënën…

Duke mirëpritur reflektimin e mazhorancës për të vijuar diskutimin dhe vendimmarrjen konsensuale në Këshillin Politik për Reformën Zgjedhore për çdo çështje lidhur me zgjedhjet, Përfaqësuesit e Opozitës së Bashkuar në Këshill duke ritheksuar se Marrëveshja e 5 Qershorit duhet të miratohet sa më parë dhe pa asnjë ndryshim, shprehen se janë të gatshëm, në ditën dhe orën e caktuar nga mazhoranca, për pjesëmarrje në mbledhjen që propozoi Përfaqësuesi i PS në Këshillin Politik.

“Në lidhje me ndryshimin e formatit të përbërjes së Këshillit Politik, nëse ju keni vlerësuar si të përshtatshme zgjerimin e përfaqësuesve të partive politike në Grupin e Punës së Këshillit Politik, atëherë ju bëjmë me dije se Opozita e Bashkuar do të përfaqësohet përveç nesh, edhe nga Sekretari i Përgjithshëm i Partisë Demokratike, Gazment Bardhi,” theksojnë Përfaqësuesit e Opozitës së Bashkuar duke vënë Bardhin përballë Edi Ramës, prezencën e të cilin e paralajmëroi Gjiknuri.

Pas kësaj përgjigje nga Përfaqësuesit e Opozitës së Bashkuar në Këshillin Politik për Reformën Zgjedhore, Përfaqësuesi i PS, Damian Gjiknuri, përcaktoi që mbledhja e Këshillit të mbahet të hënën e 20 korrikut.

“Në vijim dhe të përgjigjes nga përfaqësuesit e opozitës jashtëparlamentare, mbledhja e tryezës së Këshillit Politik mbahet ditën e hënë ora 11:00,” thuhet në njoftimin e mazhorancës.

Përgjigja e Opozitës së Bashkuar:

I nderuar koleg,

Në emër të opozitës, mirëpresim reflektimin tuaj për të vijuar diskutimin dhe vendimmarrjen konsensuale në Këshillin Politik për çdo çështje lidhur me zgjedhjet, siç kemi rënë dakord me shkrim në Marrëveshjen Politike të 14 Janarit dhe Dakordësinë e 5 Qershorit.

Paraprakisht ju konfirmojmë se dokumenti i depozituar nga një grup deputetësh të mazhorancës dhe që përmban produktin e dakordësuar në Tryezën e Këshillit Politik (siç ju rikonfirmoni me e-mail më sipër) duhet të miratohet sa më parë dhe pa asnjë ndryshim, dhe për këtë arsye, nuk mund të rihapet asnjë çështje që është dakordësuar aty.

Për çdo çështje tjetër, ne jemi të gatshëm, në orën e caktuar nga ana juaj, si të hënë ashtu edhe të martën, pa patur një preferencë për këtë. Presim konfirmimin tuaj për ditën që ju preferoni, duke shprehur gatishmërinë tonë për pjesëmarrjen në atë mbledhje.

Në lidhje me ndryshimin e formatit të përbërjes së Këshillit Politik, nëse ju keni vlerësuar si të përshtatshme zgjerimin e përfaqësuesve të partive politike në Grupin e Punës së Këshillit Politik, atëherë ju bëjmë me dije se Opozita e Bashkuar do të përfaqësohet përveç nesh, edhe nga Sekretari i Përgjithshëm i Partisë Demokratike z. Gazment Bardhi.

Mbetemi në pritje të konfirmimit të ditës nga ana juaj,

Me respekt,
Oerd Bylykbashi
Petrit Vasili