Ndërhyrja e Janullatosit/ Kriza në Kakavijë, Meta: Ishte përgjegjësi e shtetit shqiptar, grekët e bëjnë…
Edhe sot Presidenti i Republikës Ilir Meta ishte i ashpër rreth kaosit të krijuar prej pesë ditësh në Kakavijë, duke e bërë përgjegjëse qeverinë shqiptare dhe veçanërisht Kryeministrin Edi Rama që është njëkohësisht edhe ministër i Jashtëm. Kur u pyet për ndërhyrjen e Kryepeshkopit Janullatos, ai sikur pati frikë ta zë në gojë, dhe ndonëse e pajisi vetë me shtetësi shqiptare, Ilir Meta tha se grekët e bëjnë gjithmonë detyrën në mënyrë të jashtëzakonshme.
“Çdo përpjekje për të fajësuar palën greke është pa kuptim. Ne e dimë që grekët e bëjnë detyrën e tyre në mënyrë të jashtëzakonshme. Ishte dhe është përgjegjësi e plotë e shtetit shqiptar, përfshirë dhe presidentin, por në mënyrë të veçantë e qeverisë shqiptare,” tha Presidenti i Republikës duke përsëritur se Kryeministri ka përgjegjësinë edhe si kryeministër, por edhe si ministër i Jashtëm ndërsa përfundoi:
“Ne e dimë shumë mirë kur është frekuenca më e lartë e qarkullimit të qytetarëve, ndaj nuk duhej krijuar kjo situatë e jashtëzakonshme.”
Ndryshe, për gjatë pesë ditëve, nga liderët politik dhe institucional pati reagime rreth situatës së krijuar në pikën kufitare Kakavijë por vetëm sot Ministri i Shtetit për Diasporën, Pandeli Majko, bëri të ditur se ishte ndërhyrja e Kryepeshkopit Anastas Janullatos që zgjidhi krizën me radhët e makinave që prisnin të futen në greqi, radhë që ditë e tretë arritën deri në 20 km.
