Përgjigje Haradinajt, Mustafa: Në çdo kohë, LDK e gatshme të bëjë ndryshime në Qeveri!
Kryetari i Aleancës për Ardhmërinë e Kosovës, Ramush Haradindaj, pasi shpalli kandidaturën pë President tha se AAK do të kërkoj një nga postet e larta shtetërore nga Lidhja Demokratike e Kosovës ndryshe do të shkojnë në zgjedhje të reja, por Kryetari i LDK, Isa Mustafa nuk vonoi duke sqaruar partnerin e koalicionit dhe, siç tha ai, ata që nuk e kuptojnë rendin qeverisës dhe disiplinën qeverisëse se partia që ai drejton është e gatshme të bëjë rikonfigurime dhe ndryshime në çdo kohë për ata që ndjekin agjenda personale apo partiake.
“LDK do të kërkojë që Qeveria të jetë e gatshme të bëjë rikonfigurime dhe ndryshime në çdo kohë për ata që nuk e kuptojnë rendin qeverisës dhe disiplinën qeverisëse; të cilët ndjekin agjenda personale apo partiake, apo për të cilët vlerësohet se e shpenzojnë pa meritë paranë publike. Kemi premtuar Qeveri që do të jetë efikase në punën e saj, që do ta luftojë krimin dhe korrupsionin, që do të jetë racionale dhe e përgjegjshme ndaj parasë publike. Asnjë temë tjetër s’mund të na zhvendosë nga ky përcaktim,” thekson Isa Mustafa arrogant jo për herë të parë ndërsa shtoi:
“Proceset politike me të cilat po ballafaqohet vendi kërkojnë bashkëpunim dhe besim reciprok të të gjithë akterëve. Dialogu me Serbinë për njohje reciproke, qoftë në Washington apo në Bruksel do të jetë më përmbajtjesor dhe më i qëndrueshëm, nëse aksionarë të këtij dialogu janë pozita dhe opozita.”
Ka kohë që Ramush Haradinaj flet për strategjinë e dialogut, por Isa Mustafa përmes rrjetit social Facebook sqaron Ish-Kryeministrin Haradinaj se ajo duhet të jetë çështje që diskutohet dhe formohet nga kryeministri dhe kabinetit i ij i ngushtë me partnerët e koalicionit dhe liderët e opozitës.
“Pa marrë parasysh arsyen dhe nevojën e komunikimit me publikun, duhet të kemi kujdes që për strategjinë tonë të mos merr vesh Serbia përmes debateve në studiot tona televizive dhe përplasjeve të brendshme, sepse kjo në start e dëmton pozicionin dialogues të Kryeministrit tonë.”
Duke pasur parasysh se Fatmir Limaj si partner i koalicionit ishte i qartë se Kosova ka President, Isa Mustafa sqaron AAK-në dhe kryetarin e saj që kërkon postin e Presidentit se cilat janë prioritet e qeverisë:
“Qeverisja e vendit me prioritete luftimi i Pandemisë, rimëkëmbja ekonomike sikurse edhe dialogu për njohje reciproke, kërkon respekt institucional ndaj Qeverisë por gjithësesi edhe brenda Qeverisë. Një politikë qeverisëse dhe një zë qeverisës i bashkërenditur me Kryeministrin.”
