Tatimet publikojnë emrat e 2.700 individëve që nuk kanë korrigjuar të dhënat bankare për përfitimin e ndihmës

Janë mbi 2500 persona që nuk kanë përfituar ende nga paketa e ndihmave financiare 1 dhe 2, për shkak se kanë pasur të dhënat e llogarisë bankare gabim dhe nuk I kanë përditësuar ato. Tatimet kanë publikuar dy lista me emrat e punonjësve që duhet të bëjnë korrigjimin.

Administrata Tatimore ka ftuar të gjithë individët përfitues të ndihmës financiare sipas Paketave 1 dhe 2, të cilët ende nuk e kanë marrë masën e caktuar të përfitimit për shkak të plotësimit në mënyrë të pasaktë të të dhënave të llogarisë bankare (emër banke dhe/ose IBAN), që brenda datës 31 Gusht 2020, të ofrojnë informacionin e saktë, duke plotësuar të dhënat e KËRKUARA.

Plotësimi i Formularit të të dhënave bankare, është i thjeshtë dhe duhet të kryhet vetëm nga individët, sipas listave bashkengjitur këtij njoftimi, për të cilët ende nuk është kryer korrigjimi i të dhënave nga subjektet punëdhënës. Pas dorëzimit të tij do të vijohet menjëherë me kalimin në mënyrë automatike të masës së përfitimit.

Administrata Tatimore fton të gjithë individët e interesuar të verifikojnë të dhënat e tyre në listën bashkëngjitur dhe të plotësojnë menjëherë formularin e të dhënave bankare për të mundësuar sa më shpejt kalimin e ndihmës financiare në llogarinë e tyre.

Deri më 21 gusht, ndihmën financiare prej 40 mijë lekësh në kuadër të paketës 2 e kanë përfituar 172,473 qytetarë të larguar nga puna në 47,433 biznese, sipas të dhënave të përditësuara të Ministrisë të Financave.

Rreth 23 mijë qytetarë e përfituan ndihmën pas ankesave, ose rreth 14% e totalit./Monitor/