Zgjedhjet/ Humb Gjukanoviç, pushtuesi serb kthehet në Mal të Zi
Pas numërimit të 98.55 për qind të votave, Komisioni Qendror i Zgjedhjeve në Mal të Zi ka publikuar rezultatet paraprake të zgjedhjeve parlamentare ku Partia Demokratike e Socialistëve të Gjukanoviçit ka dalë e para me 35.12 për qind por që me 30 mandatet e fituara është humbëse përballë partive opozitare që tashmë kanë 41 mandate për parlamentin me 81 ulëse.
Epilogu i kësaj çmendurie ballkanike u kurorëzua me një festë para Katedrales së Kishës Ortodokse të Serbisë në Podgoricë e cila me plotë arsye tashmë krenohet për kthimin e pushtuesit serb në Mal të Zi ndërsa festa e fitores në zgjedhjet parlamentare padyshim është unike në botë, ku festohet me flamurin e shtetit tjetër, atij kriminal serb.
Kështu, sipas KQZ, për DPS-n e Gjukanoviçit kanë votuar 141.767 qytetarë ose 35.12 për qind, për koalicionin Për të ardhmen e Malit Zi 131.333 votues ose 32.52 për qind, koalicionin “Paqja është kombi ynë”ka marrë 50.672 vota ose 12.55 për qind, “E bardha në të zezë” 22.499 vota ose 5.57 për qind, Socijaldemokratët 16.524 vota ose 4.09 për qind, Partia Boshnjake 15.387 votues ose 3.81 për qind, SDP – Mali i Zi i Fortë 12. 647 vota ose 3.14 për qind.
Në këtë garë dy koalicionet shqiptare, sipas KQZ të Malit Zi kanë marrë: Koalcioni shqiptar ”Bashkë nji za” listë të cilës i prin Fatmir Gjeka, 4.675 ose 1.16 për qind dhe Lista Shqiptare Genci Nimanbegu – Nik Gjeloshaj të cilës i prin Nik Gjeloshaj 6.485 vota ose 1.61 për qind.
Pragu, sipas KQZ, nuk arritën ta kalojnë Iniciativa qytetare kroate me 0.27 për qind dhe Partia reformiste kroate me 0.13 për qind.
Sipas KQZ të Malit Zi, në zgjedhjet parlamentare të 30 Gushtit votuan 408.084 votues, ndërsa vota të vlefshme ishin 403.642.
Bartësi i listës “Për të ardhmen e Malit Zi” dhe shërbëtori i Beogradit, Zdravko Krivokapiç, si ngadhnjyes i këtyre zgjedhjeve, publikisht kërkoi nga elektorati që të mos mbledhen dhe festojnë por pasi shkoi në Katedralen e Kishës Ortodokse të Serbisë, KOS, në Podgoricë, për të falënderuar mitropolitin e KOS në Mal të Zi, Amfilohije, përmbështetjen qi ka dhënë dhe protestat që organizoi për më shumë se 2 vjet në çdo qytet, përfundoi para Katedrales ku u mbledhën mijëra serbë për të festuar ripushtimin e Malit të Zi nga Serbia.
Ndërkohë analistët në Mal të Zi vlerësojnë se për këtë humbje të Milo Gjukanoviçit dhe fitoren e opozitës proserbe, meritat më të mëdha i ka Kisha Ortodokse e Serbisë. Gjithsesi, edhe në historinë politike të këtij lideri 30 vjeçar, do të thuhet se Milo Gjukanoviç ishte bashkëpuntorë i kriminelit Slobodan Milosheviç në luftërat që zhvilloi në Slloveni, Kroaci dhe Bosnje Hercegovinë.
Ndryshe, në garën për 81 ulëse në parlament ishin 11 lista zgjedhore, 5 parti dhe 6 koalicione. Të drejtën e votës në Mal të Zi e kanë 540.026 qytetar të cilët kanë votuar në 1.217 qendra votimi.
