Shuhet Dr.Zyliha Kraja, Ish-Ministri i Shëndetësisë: COVID-19 u fut tinëzisht mes saj dhe…

COVID-19 vazhdon dhe merrë jetën e atyre që po përballen në vijën e parë me këtë virus enigmatik ndonëse Ministrja e Shëndetësisë, Ogerta Manastirliu, vazhdon dhe respekton heronjtë dhe viktimat ndër mjekë e infermierë vetëm nga Zona e I-rë Operative! Edhe sot kur kirurgjia shqiptare është në zi, kur COVID-19 i morri jetën kirurges së njohur shqiptare, Dr.Zyliha Kraja!

Ogerta Manastirliu dhe Edi Rama sot heshtin por jo edhe mijëra shkodranë që Dr.Zyliha Kraja u shërbeu deri në grahmat e saj të fundit, kur të gjithë ishin strukur në shtëpitë e tyre nga virusi i frikshëm dhe kirurgja e njohur shqiptare edhe pse në vitin e saj të 80-të të jetës, u vu në shërbim të qytetarëve të Shkodrës.

Për Dr.Zyliha Krajën flasin dhe kanë folur shumë pacientë, të afërm dhe kolegë, por sot kur shqiptarët u ndanë prej saj, dedikimi më prekës vjen nga nxënësi, kolegu dhe Ish-Ministri i Shëndetësisë, kirurgu i njohur shqiptar, Prof. Dr.Arben Beqiri:

Zyliha Kraja, një emër, që më ka përcjellë që kur kam qenë student në mjekësi dhe shkoja pas Dr.Ali Spahisë për praktikë në Spitalin Jorgji Karamitri!

Spitali i Shkodrës kishte mjekë të mëdhenj, shumë të aftë për nga profesioni, të jashtëzakonshëm për nga personaliteti, shpirtëra të lirë e të panënshtruar edhe në diktature!

Mark Mirashi me një disiplinë Gjermane dhe teknike kirurgjikale të pastër, Ramiz Hafizi një erudit që mund të barazohej vetëm me një bibliotekë, Ferit Hoti me një humor dhe ironi pozitive që nuk linte asnjë ta zinte gjumi, dhe për nga përgatitja fizike krahasohej edhe me një kampion të peshëngritjes.

Zamir Shazi aq i sjellshëm dhe etik gjithmonë i gatshëm të të ndihmonte dhe të ftonte në operacione.

Ali Spahia kirurgu i jashtëzakonshëm që kishte realizuar në Dukagjin ndërhyrje që ishin jo të lehta për kolegë në qendra universitare, që burgu politik nuk e pengoi të ishte më i liri mbi të gjithë, që udhëhoqi lëvizjen demokratike të Dhjetorit në Shkodër.

Dhe në mes tyre qëndronte e vetmja femër, kirurge, drejtuese, ekuilibri, dhe disiplina e një grupi kirurgjikal më vibranti, më intelektuali dhe më i jashtëzakonshmi që kam parë ndonjëherë kudo ku kam qenë e kam udhëtuar (dhe kam parë e udhëtuar jo pak), Dr. Zyliha Kraja!

Dita e punës në këtë mjedis ishte e veçantë, njeri të sillte një libër të ndaluar, tjetri recitonte me qindra vargje të Dostojevskit, një tjetër këndonte opera, dikush recitonte me qindra vargje të Lahutës së Malësisë së Fishtës…kujdesi për pacientët me ato kushte dhe mjete ishte i jashtëzakonshëm.

Lejla Tukiqi një tjeter kirurge e talentuar me të drejtë shprehej “mezi pres të shkoj në punë në mengjes”. Ishte plotësisht e vërtetë! Të gjithë prisnim me padurim.

Sot dirigjentja e kësaj orkestre virtuoze nuk është më mes nesh! Covid 19 u fut tinëzisht mes saj dhe pacientëve pasi sa ishte në këmbë ajo nuk u nda pre tyre.

Një muaj më parë më telefonoi, për të më shprehur opinionin e saj për një emision mbi mjekët e rinj. Ishte me të drejtë krenare që në moshën e saj 80 vjeçare dilte çdo ditë në spital dhe shprehej se do vazhdonte deri sa të mos kishin nevojë për të! Falënderonte ekipin aktual të mjekëve, trashëgimtarë të denjë të brezit vjetër, që i krijuan një ambient të këndshëm pune.

Ai ambient profesional më shoqëron gjatë gjithë karrierës time si kirurg!

Do na mungojë Dr.Zyliha Kraja!