Reforma në Drejtësi/ Në SPAK dhe BKH, Ambasadorja SHBA: Jo e lehtë, por po ecën përpara!

Pas takimit që zhvilloi sot me kreun e SPAK, Arben Kraja, dhe atë të BKH, Aida Hajnaj, Ambasadorja e Shteteve të Bashkuara, Yuri Kim, tha se Reforma në Drejtësi nuk është e lehtë por po ecën përpara.

“U takuam sot me drejtorin e BKH, Aida Hajnaj dhe kreun e SPAK Arben Kraja për të përsëritur mbështetjen e fortë të SHBA për SPAK. Reforma në Drejtësi nuk do të jetë e shpejtë ose e lehtë, por po ecën përpara hap pas hapi dhe duhet të vazhdojë në mënyrë që qytetarët shqiptarë të kenë drejtësi,” u shpreh Ambasadorja Yuri Kim përmes rrjetit social Twitter duke përfunduar:

“Sundimi i ligjit është gjithashtu thelbësor për investimet e huaja.”