Kozarev: Avni Arifi thotë të pavërteta!
Zyra për Kosovën pranë Qeverisë së Serbisë e quan të pavërteta deklaratat e kryenegociatorit të Kosovës për dialogun me Serbinë, Avni Arifi.
Duke kundërshtuar faktin e Arifit se “Kosova asnjëherë nuk e ka ndërprerë dialogun”, Zv/drejtori i kësaj Zyre, Dushan Kozarev, tha se Kosova me vendim të Parlamentit, për muaj me radhë pezulloi zyrtarisht pjesëmarrjen në dialog, dhe se Qeveria e Kosovës, deri në fillim të marsit, nuk pranoi të hyjë në procesin e themelimit të Asociacionit të Komunave me shumicë serb.
“Kjo shoqërohet me disa deklarata të zyrtarëve politikë shqiptarë në Prishtinë, se krijimi i Bashkësisë së Komunave me shumicë serbe duhet të kushtëzohet me pranimin e Kosovës në Kombet e Bashkuara dhe refuzimin për të marrë pjesë në bisedimet në Bruksel, në të cilën Asociacioni është temë kryesore,” tha Kozarev.
Sipas fjalëve të tij, Asociacioni nuk është vetëm një nga elementet e Marrëveshjes së Brukselit, por rezultati “më objektiv” i dialogut, jo vetëm për Beogradin, pasi Asociacionit i referohen gjashtë nga 15 pikat e para të këtij dokumenti.
“Beogradi ka përmbushur të gjitha detyrimet sipas Marrëveshjes së parë të Brukselit dhe çdo përpjekje nga Prishtina për të krijuar një bashkësi të komunave serbe është diçka që nuk është pjesë përbërëse e kësaj marrëveshjeje, është vetëmohimi më i neveritshëm dhe shmangie e detyrimeve të marra në procesin e negociatave”, përfundoi Kozarev në reagimin e tij me plotë të pavërteta.
