Rindërtimi dhe Ekonomia/ Edi Rama, nga termeti i 26 Nëntorit deri te kriza në fuboll!

Kryeministri Edi Rama doli sot për të folur për situatën ekonomike, rindërtimin dhe impaktin që ka ky proces, dhe ndonëse hodhi poshtë pa e lexuar Planin e Rimëkëmbjes Ekonomike të prezantuar nga Lulzim Basha, foli si pa dashje për çdo pikë të saj dhe e përfundoi këtë dalje publike me Aeoroportin e Kukësit dhe krizën në futboll.

Edhe pse Shqipëria ishte në krizë të thellë, sot Edi Rama thotë se deri një ditë para 26 Nëntorit projeksionet e ekonomisë shqiptare ishin shumë pozitive, papunësia e cila për vitin 2019 ishte më e ulëta në rajonin tonë me 11%, pritej të shkonte dhe më poshtë, borxhi në trajektore rënëse nën 65%, investimet e huaja dhe turizmi falë rritjes së mëtejshme të turistëve të huaj patjetër do të kishin një impakt të shtuar. Dhe, gjithçka ndryshoi me tërmetin e 26 Nëntorit.

“Rindërtimi një proces që përtej faktit që do të rikthejë në shtëpi të gjitha familjet e prekura nga tragjedia e 26 nëntorit dhe do të kthejë në shkollat e tyre tërësisht të reja të gjithë nxënësit dhe mësuesit që sot vazhdojnë të kryejnë procesin e mësimdhënies në shkolla të tjera, ka dhe një impakt të padyshimtë ekonomik që i vjen në ndihmë vendit dhe njerëzve në këtë periudhë të vështirë nga COVID.

Deri një ditë para tërmetit, projeksionet e ekonomisë shqiptare ishin shumë pozitive, duke iu referuar shifrave zyrtare dhe të konfirmuara nga institucionet financiare, papunësia e cila për vitin 2019 ishte më e ulëta në rajonin tonë me 11% pritej të shkonte dhe më poshtë, borxhi në trajektore rënëse nën 65%, investimet e huaja dhe turizmi falë rritjes së mëtejshme të turistëve të huaj patjetër do të kishin një impakt të shtuar por gjithçka ndryshoi me tërmetin e parë të 26 nëntorit dhe me tërmetin e dytë, virusin COVID-19.”

Dhe, fat i madh për shqiptarët që kanë Edi Ramën me Qeverinë e tij. Kështu rezulton në kokën e kryerilindasit sepse shqiptarët nuk e shohin asgjëkundi këtë prioritet!

“Masat e marra nga qeveria në të dy drejtimet, konferenca jashtëzakonisht e suksesshme në Bruksel e donatorëve që na çliroi përfundimisht nga ankthi se do të na duhej të spostonim krejtësisht gjithçka nga pikëpamja financiare tek rindërtimit duke lënë mënjanë çdo investim tjetër si dhe paketat e shpëtimit në periudhën e karantinës së përgjithshme kanë ndihmuar që sot mund të themi pa frikë tanimë, duke parë dhe rezultatet pasuese të periudhës pasuese nëse mund të kishim kaluar lehtësisht në -10% të PBB, presim të kufizohemi në më pak se 4.5%. Nuk është pak si parandalim,” tha Edi Rama.

Brenda 1 viti do tejkalojmë shkurtin e vitit 2020

Tha se janë 13 mijë persona të papunë që pas vendosjes së vendit në karantinë për shkak të pandemisë së koronavirusit, por brenda vitit tha ai qeveria falë programit të ripunësimit, do të tejkalojë shifrat e shkurtit të 2020-ës.

“Gjatë javës së fundit kemi marrë masa të tjera, e para për ripunësimin. Për personat që humbën vendin e punës gjatë karantinës, sot kemi një shifër të saktë. Kemi 13 mijë persona ende të pariintegruar, nga rreth 33 mijë që e humbën vendin e punës si pasojë e karantinës. Krahasuar me vendet e tjera, besoj s e hyjmë tek vendet që kemi humbur në terma relativ më pak. Sot jemi në kushtet kur janë 1 mln minus në Rumani, apo 45 mijë në Kosovë. Serbia 200 mijë. Këto nuk janë për të thënë se jemi përballë një çudie, apo mrekullie. Duam të ripunësojmë më shpejt ata që ishin të punësuar me herët. Ndaj kemi vënë në dispozicion programet e ripunësimit. Në harkun e një viti, do ta tejkalojmë nivelin e shkurtit të këtij viti, muaj i fundit para karantinës, ku ka pasur 11 % papunësi, shifër e konfirmuar nga Banka Botërore. Jo në raport me ata që bëjnë spekulime dhe thonë se; ‘jo ka njerëz që kanë ikur nga Shqipëria’. Ky i shkurtit është niveli më i ulet i popullsisë në rajon,” tha Rama duke shtuar se kjo qeveri ka një sfidë për të fituar, që është raporti mes vendit të punës dhe pagës, që patjetër duhet atakuar me rritjen e pagës minimale.

“S’do ketë më pagë minimale nën 300 vjetra. Nuk flasim për një ‘do të’ , por një ligj i Kuvendit të Shqipërisë në korrik. Sot biznesi i vogël, deri në 100 mln xhiro është i çliruar nga tatim-fitimi dhe TVSH. Ndërsa biznesi i vogël, ka TVSH dhe është i çliruar totalisht nga tatim-fitimi.”

Dhe, ndonëse është 7 vjet në pushtet dhe nuk pa njeri që punësoi Edi Rama përveç largimit nga puna, sot ai thotë se rindërtimi do të gjenerojë rreth 15 mijë vende pune.

“Plani për rritje të pagës minimale do të lehtësojë shtresën që paguhet më pak. Është masë e ndërmjetme mes të djeshmes dhe të nesërmes. procesi i rindërtimit ka qenë dhe mbetet përparësi. Projektet tona, 70 të tilla në Tiranë, do të gjenerojnë 15 mijë vende pune. Projektet tona impaktojnë 25 mijë persona dhe bën që të ketë punë për 2 mijë persona direkt. BE do të injektojë rreth 100 milionë euro. ne shohim 250 milionë dollarë shtesë. Janë bërë kaq shumë ndërtime, në një kohë kaq të shkurtër. Shqipëria ka paketën më të madhe historike për publiken, pa cënuar borxhin publik. Situata ka prekur borxhin publik të Shqipërisë, siç ka prekur borxhin publik të të gjitha vendeve, pa përjashtim.”

Sulmon Bashën: Shalqi me provë!

Edhe pse nuk kishte kohë as ta shoh dhe as ta lexoi Planin e Rimëkëmbjes Ekonomike nga Lulzim Basha, kjo nuk e pengoi Kryeministrin Rama të thotë se shkuarja në ekstrem me propozime të ashtuquajtura platforma alternativa është shprehje e mungesës së seriozitetit.

“Për atë që e quani kandidati për kryeministër është shalqi me provë, domethenë i pangrënshëm. Nuk është i ardhur nga hëna por ka qenë në provë disa herë. Shkuarja në ekstrem me propozime të ashtuquajtura platforma alternativa është shprehje e mungesës së seriozitetit. Mungesë serioziteti e provuar në kohën kur këtë vend e qeveriste tjetër kush. Larg qoftë që flama e COVID-it ta kishte gjetur këtë vend me këtë kandidatin dhe klubin e opozitës së bashkuar në pushtet dhe të gjente këtë vend me spitalet dhe shërbimet shëndetësore që gjetëm në kur na besuan shqiptarët, kapacitetet profesionale.”

Në delir e sipër, tha se betejën nuk e ka me opozitën por me kohën:

“Mjafton ta kujtoni atë kohë për të kuptuar që kjo nuk është një betejë mes nesh dhe aq më pak mes meje dhe shalqiut me provë që është në krye të opozitës. Një betejë e jona me vetveten dhe kohën. Koha nuk pret sepse shqiptarët kanë pritur shumë. Kjo nuk është mes nesh dhe atyre, është mes nesh dhe kohës.”

Pagat e mjekëve, infermierëve dhe mësuesve, Rama: Javën që vjen vendimi final!

Dhe pasi hodhi poshtë Planin e Bashës foli për pagat e mjekëve, infermierëve dhe mësuesve, që janë detajuar nga rivali i tij politik, duke dhënë dhe afate.

“Javën tjetër do të kemi vendimin final për pagat e mjekëve, infermierëve dhe mësuesve. Ky refuzim për të konsideruar shifrat dhe përqeshja e shifrave në emër të popullit është bërë një sëmundje që duhet kuruar nga gjithësekushi. Përgjegjësia juaj është që të verifikoni këto që themi. Nëse juve u rezulton se nga viti 2013 ose 2014 po themi, deri në 2019, të pasurit, përfshi dhe këta që quhen paturpësisht oligarkë.”

E ato që i premtoi para ardhjes në pushtet, i premtoi sot sërish pas shtatë viteve.

“Ne po bëjmë një sërë studimesh këtu dua të përfitoj ta them serish. Këtu njerëzit duhet të kuptojmë. Ata të cilët s’duan ta kuptojnë, s’kanë për ta bërë ndonjëherë. Jam i bindur se shumica e shqiptarëve e kupton. Masat e marra nga qeveria, janë masa që merren në bazë të mundësive. Si kemi pasur dje mundësitë që kemi sot. S’mund ta ulnim dje tatim-fitimin. Fakti që sot e bëjmë, s’ka lidhje që po vijnë zgjedhjet. Por kemi krijuar mundësitë. Rrisim mundësitë dhe hedhin hapa të tjerë për këtë funksion. Nëse këto gjëra që kemi bërë do i bënim dje, si magjistar, kjo s’është e mundur. Taksën progresive? Jemi duke bërë një plan. Sapo të jemi gati, do ta ndajmë me ju, që të lehtësojmë barrë. Që të rrisim fuqinë blerëse për gjithësecilin. Ndaj lëshohen si Sudja dhe Vehbiu, për të kapur ça të kapësh, nuk bëhet. Shalqi me provë që ka shartuar kungullin, nuk ka shans t’i blejnë për shalqi.”

S’ka paketë të tretë ndihme për turizmin

Për ata që nuk po binden dhe kërkojnë ndihm, me asistimin e pyetjes së porositur nga gazetari në shërbim të rilindjes, Kryeministri Edi Rama tha se nuk do të ketë paketë të tretë ndihme për bizneset:

“Me shumë kënaqësi konstatojmë se goditja në sektorin e turizmit ka qenë më e lehtë se sa ne e parashikonin, për shkak të turizmit të brendshëm dhe turizmit patriotik që u mundësua si rezultat i hapjes që i bëmë kufirin me Kosovën, Malin e Zi, Maqedonisë. Të ardhurat flasin qartë për këtë. Ndërkohë, ka dhe një element tjetër se sektori i turizmit ka në dispozicion një garanci sovrane të rëndësishme. Është ajo garancia e dytë sovrane që thuhej se nuk do të funksiononte. Janë mbi 120 mln dollarë të dhëna për kompani, përfshi këtu dhe ato të turizmit. Kemi shtyrë tatim-fitimin. Për vitin e ardhshëm nuk shoh një paketë të tretë në horizont, që do të thotë se ça flasim, s’kemi parasysh zgjedhjet. Ne mendojmë më shumë se zgjedhjet.”

Prap me Aeroportin e Kukësit…

Dhe sërish premtim elektoral Aeroporti i Kukësit! Vetëm se premtimi i sotëm i Kryeministrit Edi Rama u sofistikua, duke shtuar se do ti marrë me avion nga Londra kuksianët dhe do t’i ulë në Kukës të votojnë PD-në.

“Sot mora një informacion tjetër të detajuar për Aeroportin e Kukësit dhe unë jam i bindur nëse larg qoftë, ndonjë forcë maxhore nuk do ndërhyjë në formën e një pengese objektive kuksianët nga Londra që janë tallur dhe më kanë përqeshur në ‘Facebook’ pafund për aeroportin do t’i marr nga Londra dhe do t’i ul në Kukës unë. Do t’i sjell nga Londra të votojnë PD-në në Kukës me avion në aeroportin e Kukësit. Do t’i sjell që të votojnë PD-në. Kështu që PD-ja do ketë nga unë 120 vota në Kukës falas jo nga ato me pagesë që ishte mësuar të bënte kur kishte kompani private ajrore.”

Kriza në futboll, Rama: Duan të bojkotojnë, le ta bëjnë! 

Për fund, që të dëshmoj para shqiptarëve se Kryeministrin e kanë të gjithëdijshëm, foli dhe për futbollin. Edhe pse futbolli shqiptar vazhdon bojkotin e ligës së profesionistëve Edi Rama u tha qartë se nuk pranon kërkesat e tyre.

“Gjuha e forcës, e shantazhit nuk funksionon me mua,” tha Kryeministri Edi Rama ndërsa i porositi se mund ta vazhdojnë bojkotin.

“Ne kemi bërë një ligj për sportin dhe kemi dhënë incentiva për futbollin që se ka bërë dikush por që të na kërkojnë 10 vjet pa taksa futbollistët kjo nuk funksionon. Ne e dimë që futbollistët nuk paguhen me minimum jetik. Marrin mijëra euro dhe nuk mund t’ju themi dot 10 vjet ju nuk keni taksë në një botë kur dhe Ronaldo dhe Mesi përfundojnë në gjykatë për taksa. Patjetër një ulje fillestare, një TVSH 6% për investimet në sport. Patjetër që mund të shihet taksa e ndikimit në infrastrukturë, por patjetër që ne jemi gati të bëjmë atë që duhet dhe për zinxhirin e fëmijëve, por ndërkohë historia e futbollit me pronarë që duan të shkarkojnë në klube paratë që i detyrohen shtetit nuk kalon, as historia e me biznesmenë të pasur që kanë veshur fanellën e futbollit dhe kujtojnë se mund të luajnë topash me qeverinë nuk kalon. Ne jemi gati për të gjitha por ka ardhur koha që dhe mbështetjet e bashkive të kalojnë në mbështetje për të tjerët. Tek pjesa e profesionistëve gjërat janë të ndara dhe këto historitë me modele këtej dhe andej është mirë të mos na i tregojnë më se i tregojnë keq.”

Dhe çuditërisht edhe Kryeministrin din edhe të habitet në këtë Shqipëri që e qeveris ku asgjë më nuk është e habitshme:

“Habitem se si nuk e kanë mësuar akoma se gjuha e forcës, e bojkotit e shantazhit nuk funksionon me mua. Nuk e kuptoj dot përse iu duhet bojkoti nëse e kanë rehat bojkotin. Duan të bojkotojnë le të bojkotojnë, është e drejta e tyre. Janë të pavarur nga qeveria. Janë ent i pavarur. Me qeverinë duhet të bashkëpunojnë dhe çfarë të marrin është Ok. Qeveria nuk ka detyrim. Futbolli është industri, nëse mendojnë se mund ta mbajnë në epokën e feudalizmit me ngastra ku hidhet top e pritet top dhe nga ana tjetër fshihen lekë, mund ta bëjnë por jo me ne. Për vendin dhe futbollin ne jemi gati por nuk shoh arsye që ju që jeni këtu pse duhet të jenë 10 vjet pa taksa, çfarë bëjnë futbollistët më shumë për futbollin. Ka nga ju që vrapojnë më shumë se ata dhe nga pikëpamja e vrapit.”