Presidenti Trump transferohet në Spitalin Ushtarak “Walter Reed”
Presidenti i SHBA, Donald Trump, u transferua në Spitalin Ushtarak Kombëtar “Walter Reed” për shkak të kujdesit të shtuar, tha Shtëpia e Bardhë mbrëmjen e së premtes, pasi ai doli pozitiv me COVID-19 dhe kishte simptoma të lehta.
“Presidenti Trump mbetet në humor të mirë, ka simptoma të lehta dhe ka punuar gjatë gjithë ditës,” tha Sekretari i shtypit pranë Shtëpisë së Bardhë Kayleigh McEnany, raporton Fox News.
“Për shkak të kujdesit të shtuar dhe me rekomandimin e mjekut dhe ekspertëve të tij mjekësorë, Presidenti do të punojë nga zyrat presidenciale në Walter Reed në ditët e ardhshme,” tha McEnany duke shtuar se Presidenti Trump vlerëson mbështetjen për të dhe Zonjën e Parë.
Para se të transferohet në Walter Reed, mjeku i presidentit, Dr.Sean P. Conley, lëshoi një informacion mbi gjendjen e presidentit.
“Pas PCR-konfirmimit të diagnozës së Presidentit, si masë paraprake ai mori një dozë të vetme prej 8 gramësh të koktejit poliklonal të antitrupave Regeneron,” tha mjeku i presidentit Dr.Sean P. Conley, duke shtuar se ai e përfundoi infuzionin pa incidente.
“Për më tepër ai ka antitrupa poliklonale, Presidenti ka marrë zink, Vitaminë D, famotidinë, melatonin dhe një aspirinë të përditshme,” tha Conley duke saktësuar se nga kjo pasdite, Presidenti mbetet i lodhur, por në gjendje të mirë”.
“Ai po vlerësohet nga një ekip ekspertësh dhe së bashku ne do t’i bëjmë rekomandime Presidentit dhe Zonjës së Parë në lidhje me hapat e ardhshëm më të mirë,” tha Conley.
Zonja e parë mbetet mirë vetëm me një kollë të lehtë dhe dhimbje koke, tha Dr.Sean P. Conley ndërsa pjesa tjetër e Familjes janë mirë dhe pas testimit sot kanë rezultuar negativ për SARS-CoV-2.
