Kodi i ri Zgjedhor, Basha: Rama frikë nga zgjedhjet. S’ka formulë që e shpëton!

Kryetari i Partisë Demokratike, Lulzim Basha, në një takim me bizneset në rrugën “Myslym Shyri” në Tiranë, komentoi dhe ndryshimet kushtetuese të Kodit Zgjedhor që pritet të kalojnë sot në Parlament duke theksuar se opozita do kontestojë çdo ndryshim antikushtetues, ndërsa për qeverinë e Ramës tha nuk ka asnjë formulë që e shpëton nga humbja e zgjedhjeve.

“Shkatërrimi i institucioneve të Shqipërisë është arsyeja pse kjo bandë e ka katandisur kështu vendin. Hapat që merren sot janë thellësisht antikushtetues. Analizën e kanë bërë ekspertët e PD, por ky është tmerri dhe frika e Ramës nga procesi zgjedhor. S’ka formulë që e shpëton nga votimi popullor sikur vetëm nga premtimet e pa mbajtura ai do largohet me votë plebishitare nga shqiptarët,” tha Lulzim Basha duke shtuar se do kontestohet çdo hap antikushtetues si ky i sotmi që është në kundërshtim me 5 qershorin dhe standardet e OSBE:

“Por s’ka formulë që e shpëton këtë bandë që e cilëson Shqipërinë si çifligun e saj. Ju lus mbajeni mendjen tek ekonomia, te shqiptarët që sot do e shtrojnë vaktin e radhës vetëm me bukë,” tha Kryetari i Partisë Demokratike, Lulzim Basha, duke përfunduar:

“Kjo është emergjenca kombëtare, hajdutët s’ka gjë që i shpëton.”