Presidenti Trump refuzon të marrë pjesë në debat virtual me Bidenin

Debati i dytë në mes të Presidentit të SHBA, Donald Trump, dhe kandidatit demokrat, Joe Biden, do të mbahet virtualisht, ka bërë të ditur Komisioni për Debate Presidenciale.

Por Presidenti Trump tha se nuk do të marrë pjesë në një format të tillë debati.

“Nuk do të marr pjesë në debat virtual. Nuk do të humb kohën time në debat virtual,” tha ai për Fox Business.

Debati i dytë në mes të dy rivalëve është planifikuar të mbahet të enjten e javës së ardhshme.

Ky vendim vjen pasi Presidenti Trump vazhdon të trajtohet për koronavirus në Shtëpinë e Bardhë. Mjeku i tij është shprehur se ai nuk ka pasur simptoma për më shumë se 24 orë.

Ndryshe, mbrëmë është mbajtur debati i parë në mes të dy kandidatëve për Zv/President të Shteteve të Bashkuara. RFE raporton Zv/Presidentin aktual të SHBA, Mike Pence, është përballur me kandidaten demokrate, Kamala Harris, për një varg çështjesh, ndonëse koronavirusi ishte në qendër të debatit.