Rrëshqitje të dherave/ Rrezikohet ura, Fierza po i afrohet kuotës maksimale

Moti i keq me reshje intensive të shiut ka krijuar shumë problematika në Qarkun e Kukësit ku janë shënuar edhe reshje bore në lartësi prej 2000 metra mbi nivelin e detit. Në disa akse rrugore janë raportuar rrëshqitje të dherave duke sjellë vështirësi për qarkullimin e mjeteve ndërkohë raportohet se liqeni i Fierzës po i afrohet kuotës maksimale

Në Tropojë, ka pasur rrëshqitje në një pjese rruge afër urës së Balishajës, në fshatin Kojel ku një urë rrezikon të bjerë duke izoluar fshatrat Shumicë e Ahmataj.

Për reshjet e shiut që u tha se kanë dhe efekt pozitiv për të mbjellat vjeshtore, ato njëkohësisht kanë rritur edhe nivelin e lumenjve dhe liqeneve. Kjo ka sjellë që në HEC-in e Fierzës niveli i ujit të arrinë në nivelin 274 metër ndërsa prurjet e ujit janë mbi 200 metër/kub në sekondë.