Krizë shëndetësore, Basha: Është rritur numri i të infektuarve me COVID-19, ka rënë ai i testimeve !

Deri sa rritja e numrit të rasteve me COVID-19 vazhdon Kryetari i Partisë Demokratike, Lulzim Basha, tha se arsye është mungesa e testimeve ndërsa akuzoi qeverinë se nuk po jep buxhet të mjaftueshëm për sistemin shëndetësor dhe se nuk i ka ofruar asnjë ndihmë të prekurve me koronavirus.

“Dy krizat janë kriza shëndetësore dhe ajo ekonomike. Kam marrë me qindra, mijëra sms gjatë këtyre ditëve nga qytetarët, të cilët thonë se “pse lodhesh, ai s’ka bërë gjë për këto 8 vite, s’do bëjë gjë më”. Unë dua t’u them se nuk do të lodhëm duke përsëritur kërkesën që shtetit shqiptar t’u kthejë qytetarëve shqiptarë paratë e taksave të tyre në formë mbështetje që kanë sot nevojë,” tha Lulzim Basha duke shtuar:

“Sot qytetarët që kanë nevojë për testin Covid, s’e bëjnë dot. Qindra të tjerë s’kanë mundësi që të marrim mjekimin e duhur. S’kanë mundësi financiare për kurimin ndaj Covidit. Mijëra qytetarë nuk i sigurojnë dot shportën ushqimore, ata presin ndihmë nga shteti. 1/3 shqiptarë nuk e përballojnë dot jetesën. Shumica e bizneseve janë në prag falimentimi,” tha lideri i Opozitës së Bashkuar duke e bërë të qartë se nuk do të lodhet duke përsëritur që shteti shqiptar të kryejë detyrimin ndaj shqiptarëve dhe të vërë në lëvizje këto fonde.

“Numri i testimeve ka rënë, është rritur numri i të infektuarve. Asnjë medikament që jepet për të trajtuar COVID-in nuk rimbursohet. Mosrimbursimi i ilaçeve në këto kushte është i pafalshëm. Kjo është çështje jete, çështje shëndeti. Kemi 2 javë e gjysmë që kërkojmë që sistemi i shëndetësisë të vihet në alert të plotë, por nga kulltuqet e zyrave bëjnë propagandë,” tha Basha sot që kur buxheti i sistemit të shëndetësisë vijon të jetë sa gjysma e buxhetit të shëndetësisë në Maqedoni dhe paratë po përpihen nga aferat korruptive.

Edhe gjatë bashkëbisedimit të sotëm Kryetari i PD parashtroi Planin e Partisë Demokratike për rimbëkembjen ekonomike.

“Urgjentisht të pajisen me tableta familjet që nuk kanë mundesi ekonomike t’i blejnë për fëmijët e tyre. Investim në teknologji për mësimin në distancë, të përgatitet infrastruktura në rast se shkollat mbyllen. 160 mijë lekë/muaj për të papunët, 200 mijë lekë/muaj për çdo rimarrje në punë nga biznesi.

Çek 1000 euro për biznesin e vogël. Subvencionim i qirasë, heqja e taksës së pronës, shtrirja në kohë e mundësisë për të marrë kredi me garanci shtetërore,“ tha Basha duke përsëritur nevojën e zbatimit të këtij Plani me 5 Pika sa më parë.

“Çdo ditë që kalon e rëndon më shumë krizën. Numri i raportimeve ishte thuajse gjysma kur prezantuam këtë plan. Kurrë s’kam dalë para jush për të bërë Kasandrën, por mos marrja e masave tregon qartë se shkaktari, përgjegjësi kryesor, nuk është më pandemia, po keqqeverisja që po rrezikon ditë për ditë jetën e shqiptarëve.“

Në fund të këtij komunikimi të përditshëm me gazetarët, Kryetari i Partisë Demokratike, Lulzim Basha, u pyet nëse do të vijojë edhe javën e ardhshme me konferenca apo do të ketë një skenar të dytë.

“Ditën që opozita të ketë më shumë se fjalën, nuk është më opozitë, por qeveri. Këtë që ka propozuar si plan, nesër do ta bëjë realitet. Sot detyra ime është të grisë propagandën qeveritare dhe t’iu tregojë shqiptarëve se ka një rrugëdalje, dhe të ushtrojë presionin për të hedhur poshtë gënjeshtrat e qeverisë.”