Dokumenti/ Kallëzim në SPAK, PD: Rama, Ahmetaj, Koka dhe Veliaj akuzohen për…

Pas denoncimeve të shumta për inceneratorët sot Partia Demokratike ka shkuar një hap tutje duke dorëzuar kallëzim penal në Prokruorinë e Posaçme kundër Krimit të Organizuar dhe KOrrupsionit, SPAK, ndaj Kryeministrit Edi Rama, Ish-Ministrit të Financave, Arben Ahmetaj,  Ish-Ministrit të Mjedisit, Lefter Koka, dhe Kryetarit Bashkisë Tiranë, Erion Veliaj, si dhe dy shtetasve të tjerë pjesëmarrër në këtë krim, Klodian Zoto dhe Mirel Mërtiri.

Pas dorëzimit të këtij kallzimi në SPAK, Sekretari për çështje ligjore pranë PD, Çlirim Gjata, u shpreh:

“Ka 3 vjet që pothuajse bëhen denoncime të përditshme, pa folur për media që kanë nxjerrë skandale pas skandalesh. Pse duhet të presim SPAK apo çdo institucion tjetër një denoncim formal. Ka 3 vjet që një gjë e tillë po ulërinë në shoqërinë shqiptare. Denoncimet janë dytësore sa i përket procedurës.”

Ndërsa, Ish-Deputetja e PD, Jorida Tabaku, shtoi se Qeveria dhe Bashkia Tiranë janë kthyer në funksion të këtij inceneratori.

“Edi Rama me Arben Ahmetajn, Erion Veliajn, e shumëzuan me zero investimin e partnerëve ndërkombëtarë dhe filluan incenerimin e mbetjeve sepse vetëm në këtë mënyrë mund t’i vidhnin qytetarëve 430 milionë euro për Tiranën.

E gjitha qeveria dhe bashkia është kthyer në funksion të këtij inceneratori. Kanë krijuar një biznes me persona të identifikuar për pastrim parash në Itali të lidhur me Ndranghetan. Ajo që është absurdi më i madh, Bashkia e Tiranës ka rritur tarifat me 30% për t’i krijuar punë, me atë buxhet që është me buxhetin e shtetit.”

Ndryshe, Shpërdorim detyre, Shkelje e barazisë së pjesëmarrësve në tendera apo ankande publike, si dhe Krijimi i grupit të strukturuar kriminal, ishin objekte të këtij kallzimi në SPAK ku kërkohet dhe pezullimi i ushtrimit të detyrës publike ndaj këtyre personave.