“Mbështetja për bujqësinë”, reagimi, PD: Edi Rama falimentoi fermerët me taksa!

Pasi Kryeministri Edi Rama e nisi mëngjesin e sotëm duke u mburrur se qeveria që ai drejton e mbështetë bujqësinë në terma financiar deri 175% ka reaguar Partia Demokratike përmes Dorjan Telitit duke theksuar se pasi ka dështuar të japë llogari për premtimet e pambajtura për bujqësinë, Rama orvatet t’u hedhë hi syve fermerëve të falimentuar nga taksat e larta dhe mungesa e mbështetjes konkrete për to.

“Në 2013 premtoi naftë pa akcizë për fermerët, por u shtoi edhe taksën e qarkullimit 24 lek/litër. Vetëm nga kjo taksë absurde që s’ka asnjë lidhje me bujqësinë, fermerët kanë paguar rreth 100 milionë euro në 7 vitet e qeverisjes së tij,” thekson Dorjan Teliti duke shtuar se fermerëve u premtoi dhe 40 milionë euro investime në vit, por nuk ka financuar as gjysmën e tyre.

Ndërsa 70% e fondeve të akorduara, sqaron Partia Demokratike në reagimin përmes rrjetit social Facebook, janë dhuratë nga Bashkimi Europian. Dhe, bilanci i vërtetë i Edi Ramës në bujqësi është ky:

-rreth 100 milion euro taksë qarkullimi paguar nga fermerët në shtatë vite;

-70% të fondeve për bujqësinë i përfitojnë 50-60 grosistë;

-2% e fermerëve kanë marrë mbështetje, ndërsa 98% e tyre nuk e kanë parë dorën e ndihmës nga shteti;

-30-40% më e lartë është kosto e prodhimit krahasuar me rajonin;

-30% më i ulët është rendimenti i prodhimit bujqësor e blegtoral, krahasuar me rajonin;

-2/3 e tokës nuk kanë akses në ujitje e kullim;

-Vetem 2,8% e fermave kane traktore apo mjete te mekanizuara.

Fermeri shqiptar nuk lexon grafikët e vizatuar nga propaganda, thekson Drejtori i kabinetit Dorja Teliti, duke përfunduar:

“Fermeri shqiptar lexon xhepat e tij të shpuar nga taksat e larta, kostot e larta, kalbja e prodhimeve të pashitura dhe mungesa e plotë e mbështetjes nga shteti.”