Nesër votohet Kodi Zgjedhor, McAllister: Shumë i shqetësuar!

Pas paralajmërimit të Kryeministrit Edi Rama se nesër do të votohet Kodi Zgjedhor pa e pritur opinionin e Komisionit Venecias, ka reaguar Kryetari i Komisinonit të Jashtëm pranë Parlamentit Evropian, David McAllister, duke u shprehur shumë i shqetësuar për ndryshimet e njëanshme të Marrëveshjes së 5 Qershorit që dëmtojnë dhe përpjekjet për hapjen e konferencës së parë ndërqeveritare deri në fund të vitit:

“Shumë i shqetësuar që, pavarësisht thirrjeve kombëtare dhe ndërkombëtare, duke kërkuar që të presin një mendim të Komisionit të Venecias, votimi për ndryshimet në Kodin Zgjedhor të Shqipërisë është caktuar të bëhet ditën e nesërme,” shprehet McAllister në reagimin e tij përmes rrjetit social Twitter duke përfunduar:

“Ndryshimet e njëanshme të marrëveshjes mund të ngulitin më tej klimën e mosbesimit dhe polarizimit përpara zgjedhjeve të përgjithshme të 25 prillit 2021. Ato do të jenë joproduktive ndaj përpjekjeve për hapjen e konferencës së parë ndërqeveritare deri në fund të vitit.”

Ndryshe, me kthimin e ndryshimeve në Kodin Zgjedhor, Presidenti i Republikës, Iliri Meta, iu drejtua Komisionit të Venecias për opinion lidhur me këto ndryshime që para së gjithash shkelin barazinë dhe Marrëveshjen e % Qershorit të miratuar në Këshilin Politik. Ky veprim i Presidentit, për Kryeministrin Edi Rama u konsiderua i papranueshëm, sepse pas 7 vjetësh vetëm gjatë kësaj jave ai nuk ka kohë për të pritur.