Kërcënohet Dritan Abazoviç, Mali i Zi kërkon ndihmë nga Interpol

Mali i Zi ka kërkuar ndihmën e Interpolit pas kërcënimeve përmes mediave sociale ndaj liderit të Aksionit të Reformës së Bashkuar, URA, Dritan Abazoviç.

Policia malazeze identifikoi R.SH nga Rozhaja, i cili kërcënoi Dritan Abazoviçin, përmes rrjetit social Facebook. Por, meqenëse R.SH nuk jeton në Mal të Zi, u kërkua ndihma e Interpolit.

“Sipas deklaratës së një të afërmi të ngushtë, R.SH nuk jeton në Mal të Zi, por në Suedi dhe kemi përcjellë një kërkesë për Interpol-in në Suedi përmes Departamentit për Bashkëpunim Operacional, duke kërkuar kontrolle të caktuara për këtë person,” thuhet në përgjigjen e policisë malazeze për RFE.

Ndryshe, R.SH. përmes komenteve në Facebook, më 10 shtator i tha Abazoviçit se do të masakrohej nëse vazhdonte “miqësinë” e tij, domethënë negociatat dhe bashkëpunimin me “çetnikët”.

Kjo çështje, sipas policisë, po trajtohet nga Prokuroria e Ulqinit.

“Abazoviç u informua për aktivitetet e ndërmarra dhe deklaroi se ai nuk ndihej i kërcënuar në lidhje me këto kërcënime,” tha policia.

Për shkak të një sërë kërcënimesh, më 3 shtator, URA kërkoi një vlerësim urgjent të sigurisë së udhëheqësit, Dritan Abazoviç, dhe pronës së tij nga Agjencia e Sigurisë Kombëtare e Malit të Zi, ANB, dhe Drejtoria e Policisë.

Koalicioni “E zeza mbi të bardhë” i udhëhequr nga Dritan Abazoviç, ai “Për të ardhmen e Malit të Zi” në krye me Frontin Demokratik dhe koalicioni “Paqja është kombi ynë” dolën fitues të zgjedhjeve parlamentare që u mbajtën më 30 gusht në Mal të Zi./RFE/