Në kantierin e rindërtimit në Tiranë, Edi Rama flet për COVID-19 dhe Bashën
Kryeministri Edi Rama sot në hapjen e kantierit të parë të rindërtimit të një lagjeje të re në Tiranë, që do të strehojë 11 mijë banorë, që humbën shtëpinë nga tërmeti tragjik i 26 nëntorit 2019 foli më shumë për pandeminë COVID-19 dhe sjelljet e opozitës në veçanti Kryetarit të PD, Lulzim Basha duke e akuzuar se thotë përralla për pandeminë, pasi nëse paratë shpenzohen sot për sot, nesër do vdesin njerëzit rrugëve nga papunësia, teksa qeveria nuk do të ketë lekë të paguajë mjekët e infermierët.
“Sot procesi i rindërtimit hyn në një fazë të re, me çeljen e kantierit të parë të madh të kryeqytetit, i pari ndër disa kantiere të mëdha, që nuk janë thjesht një përgjigje për nevojën e familjeve, që humbën strehën e tyre në natën tragjike të 26 nëntorit të shkuar, por janë një reagim ndaj një krize të shkaktuar nga natyra në funksion të të ardhmes.
Ka dy mënyra për ta përballuar një krizë, njëra për ta përballur si një shfaqje të momentit dhe për të kuruar plagën momentalisht, dhe mënyra tjetër është për ta përballur si një mundësi të re për t’u ngritur më lart se sa përpara se kriza të shfaqej. Unë gjithmonë kam besuar dhe besoj se çdo krizë është një mundësi e madhe. Nëse populli thotë të këqijat nuk vijnë vetëm për keq, atëherë kjo ishte një e keqe shumë e madhe, së pari për familjet që humbën tragjikisht familjarët e tyre, pastaj për mijëra familje të tjera që humbën strehën. E mira në këtë të keqe është se së bashku ne po ngrihemi më lart seç ishim përpara se të ndodhte tragjedia,” tha Edi Rama i bindur se Tirana, Durrësi e të gjithë zonat e tjera me radhë, që u goditën, pas rindërtimit do të jenë vende më të mira seç ishin për njerëzit, para se të ndodhte tragjedia.
“Kjo zonë këtu mbase do të ishte prekur për t’u ngritur më lart pas 10-20-30 vitesh, kur të krijoheshin mundësitë. Ndërkohë që ne e prekim këtë zonë sot me ambicien që mbi këto rrënoja apo ngrehina kaotike të shumë dekadave të mbledhura së bashku të ndërtojmë në pak vite një qendër të re të Tiranës, një adresë të re për Tiranën që duam, për gjeneratat e tjera, dhe një hapësirë cilësisht të re për plot 11 mijë banorë të vjetër e të rinj, që do të jetojnë në këtë zonë si në ndonjë periferi të largët e me shumë mungesa të një kryeqyteti që zhvillohet, por që do kohën e vetë të zhvillohet njësoj në gjithë territorin, por do të jetojnë si një zonë ku do të jetë kënaqësi të jetosh,” tha Kryeministri duke u munduar ti bindë zotëruesit e këtyre pronave në të ardhmen se vlera e pasurisë së patundshme do të jetë shumëfish më e lartë nga sa është sot këtu.
“Nëse dikush ka humbur një shtëpi në Tiranë me një vlerë X dhe do të hyjë së shpejti në apartamentet e lagjeve të reja do të disponojë një shtëpi më të fortë, por edhe një vlerë më të madhe pasurore. Më 26 nëntorin e shkuar ne u gjendëm përballë një sfide të jashtëzakonshme, me 15 mijë familje që brenda pak sekondash u gjendën pa shtëpi. Në pak muaj na ndodhi që të vendoseshim mbi një sprovë mbi sprovën, që ishte shfaqja e armikut të padukshëm, që edhe sot mbanë botën në ankth e sprovon të gjitha qeveritë. Janë dy goditje njëra pas tjetrës, që askush tjetër nuk do të kishte mundur dot t’i rezistonte, sikundër ne jo vetëm po i rezistojmë, por po i rezistojmë me forcë, durim dhe me sukses.”
Dhe, vendin e zuri COVID-19, i cili sipas Edi Ramës mund të kishte përmbys krejtësisht gjithçka.
“Mund të kishte detyruar Shqipërinë, duke na detyruar ne të futeshim në një gjendje thjesht mbijetese të përditshme, duke i lënë mënjan të gjitha planet e të nesërmes dhe duke harruar madje që ka të nesërme. Në fakt, njerëzit dëgjojnë përditë, me gjithë brutalitetin e atyre që janë në anën e stolave rezervë dhe që duan të rikthehen në krye të punëve të vendit, të cilët insistojnë me këmbënguljen e atij që nuk sheh dot përtej hundës së vet, përtej të sotmes, nuk ka asnjë vizion për të nesërmen, se ne duhet të shpenzojmë gjithçka kemi për të përditshmen.”
Por ishte e qartë se faktet e atij që, sipas Ramës, nuk sheh dot përtej hundës së vet, pra Lulzim Basha, ka acaruar Kryeministrin e Shqipërisë, i cili iu përgjigj propozimeve për krizën e pandemisë dhe rimëkëmbjen e ekonomisë që bënë çdo ditë Basha.
”Do i çojmë përpara gjithë këto punë sepse ndërkohë kush nuk ka punuar kurrë, dhe kush është mësuar të flejë gjumë si miku im, Luli, e t’i gjejë gjërat gati kur hap sytë mes dy periudhash të përgjumjes, nuk e kupton se nëse ti ndalon aktivitetin, investimet, që jep punë e prodhon të ardhurave, dhe çfarë parash ke i shpenzon sot për sot, nesër jo vetëm që të vdesin rrugëve se s’ke me çfarë paguan mjekët dhe infermierët, por të vdesin njerëzit nga papunësia. Me ato përrallat.
Po kur thotë ndalo infeksioni, bëj testime më shumë. Pse nuk ndalon Franca, Gjermania, spe nuk e ndalon askush infeksionin, se i bënë më shumë apo më pak testime. Kush jemi ne, kush jam unë, kush janë politikanët të vendosin sa testime duhet të bëhen. Kemi detyrime t’u përgjigjemi qytetarëve,” tha Kryeministri Edi Rama duke u quajtur budallallëqe ato për të cilat flasin Lulzim Basha dhe Monika Kryemadhi ndërsa e vlerëson situatën jashtëzakonisht të ngatërruar.
“Në mbyllje dua t’ju them njerëzve që i mirëkuptoj plotësisht në padurimin e tyre, sidomos ata që mezi presin të kthehen në shtëpi. E kam për disa të tjerë që flasim e flasim. Pë vonesa? Cila vonesë? Nga 26 nëntori i shkuar, nuk është bërë ende viti dhe ne ndërkohë kemi vendosur faktikisht në dispozicion një financim masiv nga buxheti i shtetit. Çfarë shihni deri më sot, çerdhe, shtëpi, infrastrukturë është nga buxheti. Asnjë kokërr lekë akoma nga pjesa tjetër. As nga konferenca e donatorëve , asnjë kokërr leku. Nga ato fondet që u deklaruan në Bruksel në shkurt, administrohen akoma nga to. BE të vetat, Gjermania, Franca, Italia, Turqia , Emiratet të gjitha të vetat. Natyrisht na takonte ne të ecim më shpejt.”
