Shifrat COVID-19 po rriten, fatalitetet po shtohen, Basha: Sot, jo llafe, veprime të shpejta!

Kryetari i Partisë Demokratike, Lulzim Basha, edhe javën e parë të Nëntorit e nisi me shqetësimin mbi situatën e krijuar me COVID-19, ku numri i të infektuarëve po rritet, fatalitetet po shtohen dhe sistemi shëndetësor po shkon drejt kolapsit ndërsa i bënë thirrje kryeministrit Edi Rama që të ndëmarrë veprime të shpejta për të përballuar pasojat e pandemisë.

“Numri i të sëmurëve nga Covid-19 po rritet përditë, fatalitetet po shtohen dhe kapacitetet shëndetësore po shkojnë drejt kolapsit. Rama ka humbur kontrollin mbi pandeminë, megjithëse vala e dytë ishte paralajmëruar. Po të na kishte dëgjuar, qeveria do kishte marrë masat e duhura,” thekson Lulzim Basha duke reaguar përmes rrjetit social Twitter ndërsa përfundon:

“Në vend të llafeve, sot më shumë se kurrë duhen vendime dhe veprime të shpejta për të rritur testimet dhe fonde për të ndihmuar të sëmurët, shëndetësinë dhe ekonominë. Asgjë nuk është më e çmuar se jeta e njerëzve!”