Kërkesa për njohje të ndërsjellë Kosovë-Serbi, Vuçiç: E pakuptimtë!
Kërkesat për njohje të ndërsjellë mes Kosovës dhe Serbisë janë të pakuptimta, ka deklaruar presidenti i Serbisë, Aleksandar Vuçiç, pas takimit të Qeverisë së re në Beograd.
Pas seancës së 2 nëntorit ku mori pjesë si President, raporton RFE, Vuçiç tha se njohja e ndërsjellë nuk është një çështje që Serbia do ta diskutojë ndonjëherë dhe përsëriti se Prishtina është e obliguar të përmbushë detyrimet e saj nga Marrëveshja e Brukselit, e cila së pari përfshin formimin e Asociacionit të komunave me shumicë serbe.
“Na duhet një zgjidhje kompromisi midis Prishtinës dhe Beogradit,” tha Vuçiç duke e bërë të qartë se në kontekstin e Kosovës, për Serbinë janë të rëndësishme zgjedhjet e ardhshme në Shtetet e Bashkuara.
“Joe Biden është i preferuari i tyre, nuk është sekret. Unë personalisht kam marrëdhënie korrekte me të, por ajo politikë nuk ishte në favor të Serbisë. Sa i përket fitores eventuale të zotit Donald Trump, e cila është e vështirë por jo e pamundur, atëherë do të ishte diçka më e lehtë për Serbinë,” tha Aleksandar Vuçiç.
Ndryshe, Zgjedhjet presidenciale në Shtetet e Bashkuara do të mbahen sot më 3 nëntor ku në garë janë presidenti aktual, Donald Trump dhe kandidati demokrat, Joe Biden.
