Rindërtimi, Edi Rama inspekton kantieret në Thumanë dhe Fushë Krujë
Mbreslënëse, e vlerësoi Kryeministri Edi Rama punën në kantierin e rindërtimit të banesave për familjet e mbetura pa shtëpi në natën tragjike të 26 nëntorit në Thumanë, infrastrukturën rrugore, pallatet, shkollën, kopshtin, ambulancën, njësitë e shërbimeve publike si edhe qendrën e re komunitare së bashku me terrenet sportive e parqet.
Ndërkohë ministri i Rindërtimit, Arben Ahmetaj, e informoi Kryeministrin për ecurinë e punëve nga Fondacioni Firdeus dhe punët në Thumanë që po financohen nga buxheti i shtetit shqiptar.
Para Thumanës, Kryeministri inspektoi kantierin në Fushë Krujë ku gjithashtu po marrin formë banesat individuale, dhe sipas Edi Ramës, në pak javë do të nisin themelet për 15 pallate banimi me 100 apartamente, të cilave do t’u bashkëngjiten qendra shëndetësore, zyrat e shërbimeve, zonat e gjelbërta dhe një treg modern për produktet e zonës.
“Lagja Rilindja shtrihet në 10 hektarë tokë dhe do të ndryshojnë rrënjësisht cilësinë e jetës së fëmijëve, prindërve, gjyshërve, që së shpejti do të banojnë në këtë zonë, në kushte pakrahasimisht më të mira se ato që kishin deri një vit më parë,” tha Edi Rama duke prezantuar një projekt gjigant dhe duke zhvleftësuar si punën ashtu dhe postin e Kryeministrit me cilësimet e opozitës si qenë, që edhe mund të lehin por karvani do të ecë më shpejt përpara.
Edhe këtu ministri Ahmetaj e informoi Kryeministrin se deri në fund të vitit do të dorëzohen 50 banesa me çelësa në dorë ndërkohë që kryebashkiaku i Krujës po përzgjedh familjet prioritare.
”Jemi në Fushë-Krujë. Në kompleksin e rindërtimit. Ku ka një kombinim me 128 banesa individuale, siç e shikoni nga inspektimi juaj i fundit puna ka ecur me ritme shumë të shpejta. Kemi dhe 100 banesat kolektive,” tha ministri i Rindërtimit, Arben Ahmetaj, duke siguruar Kryeministrin Edi Rama se gjithë zona do të dorëzohet brenda afateve të kontratës.
