Betohet kryetari i ri i komunës Podujevë, Shpejtim Bulliqi
Sot Shpejtim Bulliqi u betua dhe nënshkroi deklaratën për marrjen e detyrës së kryetarit të komunës Podujevë. Pas nënshkrimit të deklaratës, Bulliqi duke fol si kryetar i ri i komunës së Podujevës, premtoi që detyrën e tij të kryetarit do ta bëjë me besnikëri e në mënyrë të paanshme.
“Unë Shpejtim Nazmi Bulliqi, betohem se do t’i kryej detyrat dhe do t’i ushtroj kompetencat e mia, si kryetar i komunës së Podujevës, me nderë, besnikëri, në mënyrë të paanshme, me ndërgjegje dhe në pajtim me ligjin, në mënyrë që t’i siguroj kushte për jetë të qetë për të gjithë,” tha Bulliqi duke shtuar se tani ka përgjegjësi të lartë ndaj qytetarëve të Podujevës, për t’i shërbyer këtij komuniteti, dhe se është ndjenjë e lartë e përgjegjësisë, duke llogaritur edhe pritjet e qytetarëve për qeverisjen e kësaj komune.
“Sot unë marrë përgjegjësi të lartë që më besuat nga qytetarët e Podujevës, për t’i shërbyer një komuniteti e një rrethinë të vendit tonë […]Krahas kësaj nuk mungon edhe ndjenja e lartë e përgjegjësisë që kemi unë dhe bashkëpunëtoret të mi, kur i llogarisim pritjet e qytetarëve të Podujevës, për modelin e shërbimit që ata presin nga ne dhe për të cilin na kanë besuar.”
Me këtë rast, Shpejtim Bulliqi tha se do ta drejtoj një komunë e cila ka nxjerr emra të mëdhenj në të gjitha proceset e Kosovës.
“Me bashkëpunëtorë dhe me profesionist të dëshmuar të Llapit do të drejtojmë një komunë dhe një komunitet që ka nxjerrë emra të mëdhenj në të gjitha proceset e jetës shoqëroro-politike, kombëtare, kulturore, shkencore, e sportive. Një komunë dhe një komunitet që ashtu siç e ka dashur puna dhe detyra e atdheut tonë, i është përgjigjur sic është më së miri… Llapi i ka dhënë Kosovës emra si Adem Demaçi, e Shaban Shala, Afrim Zhitia, Ali Ajeti dhe Zahir Pajaziti, Enver Maloku, Xhemajl Mustafa e Avdush Hasani. Ne i kemi dhënë vendit sportist si legjenda Fadil Vokrri e Favzi Rama.”
Pas ceremonisë së betimit dhe nënshkrimit të deklaratës, Shpejtim Bulliqii mori detyrën nga ushtruesi i detyrës së kryetarit të komunës së Podujevës, Nexhmi Rudari.
Ndryshe, në zgjedhjet e jashtëzakonshme për kryetarin e komunës së Podujevës që u zhvilluan më 29 nëntor, fitoi Shpejtim Bulliqi nga Lëvizja Vetëvendosje.
