Nuk e shkarkoj Ardi Veliun, Edi Rama: Protesta, akt degradimi i Ilir Metës!

I pagabueshmi Edi Rama që vazhdon të jetë Kryeministër sot identifikoi shumë fajtorë për situatën e krijuar, por të tillë nuk gjeti në qeverisjen e tij. Ardi Veliun tha se nuk e shkarkon sikur 500 mijë vetë ta kërkojnë ndërsa protestat kundër vrasjes së 25-vjeçarit Klodian Rasha nuk i pranon se mund të jenë reagim qytetar, siç u mundua ti shet ato kundër armëve kimike; Meqë nuk i kishte bërë vet, sot akuzoi Presidentin e Republikës, Ilir Meta. Dhe jo vetëm kaq!

Në bashkëbisedim me gazetarët ai akuzoi edhe Kryetarin e Partisë Demokratike, Lulzim Basha, edhe pse sipas tij nuk kishte lidhje me protestat. Sipas njeriut më të moralshëm në Shqipëri, që vazhdon dhe quhet Edi Rama, Lulzim Basha duhet të dilte e të thoshte publikisht se nuk merret pushteti në këtë mënyrë. A e kishte bërë vetë këtë gjë?! Historia e afërt na thotë jo edhe pse vetë e organizoi 21 Janarin e vitit 2011 ku kërkonte largimin e Ilir Metës së korruptuar dhe sot tha se “nuk vendoset në rrugë se kush ikën e kush vjen”.

Gjithsesi, sot nuk ishte e qartë pse doli kur nuk kishte qetësi sepse edhe pas vizitës që i bëri babës së Klodian Rashës së vrarë nga regjimi i tij, asgjë nuk ndryshoi nga refuzimi që ai i bëri pensionit të posaçëm. Që kjo dalje e tij publike të ketë kuptim, akuzoi gazetarët madje edhe ata analistë që i ndërsente kundër Saliut për të ardhë në pushtet ndonëse janë sot ashtu siç ishin kur Edi Rama ishte në opozitë, esktremistë të majtë!

“Edhe kur u ngritën kuksianët, edhe shumë më tepër se aq të ngrihen e të hidhen përpjetë, nëse nuk kanë të drejtë, nuk ndodh ta zmbrapsin qeverinë, për sa kohë unë do jem në krye të saj. Ne reflektuam, sepse të gjithë banorët e Kukësit kishin të drejtë. Qeveria kupton cila është e drejta dhe bënë gjënë e drejtë. Demokracia nuk është një sistem i përsosur. Curcill ka thënë që është sistemi më i keq, po të mos i llogarisim sistemet e tjera. Asnjë qeveri nuk e ka gjithmonë të drejtën me veten në çdo gjë që bën apo projekton, prandaj e drejta e protestës është e pacenueshme, por kjo nuk do të thotë që protestuesit kanë gjithmonë të drejtë. Aty ndahen qeveritë demokratike me qeverinë që nuk janë demokratike. Aty ndahet qeveria jonë me atë që kishim më parë.

Si mund të vihet në diskutim tani që nga rruga, jo këta, po sikur të ishin 500 mijë veta, të kërkojnë tani të ikë dhe drejtori i policisë? Nuk vendoset në rrugë se kush ikën e kush vjen, por vendoset në bazë të çfarë është e drejtë. Ishte e drejtë që qeveria të kërkonte ndjesë, jo se kishte gisht në tragjedinë që ndodhi, por sepse djalin e vrau arma e shtetit. Ishte e drejtë që ministri i Brendshëm të këmbëngulte që duhet të largohej, jo se kishte përgjegjësi në ngjarje, por sepse ishte e drejtë që mesazhi i pjesëmarrjes në dhimbjen e asaj familje të mos ishte vetëm me fjalë. Këto nuk janë bërë si rezultat i protestës, që të jemi shumë të qartë. Edhe unë po të mos isha kryeministër, do të kisha dalë në protestë, por jo në këto protesta, por në atë protestën e parë. Jo për t’iu hedhur në fyt policëve apo për të kapur kanatet e institucioneve e lëshuar gojën, por për të dëshmuar indinjatë qytetarisht. Qysh në momentin e parë ndaj ngjarjes është mbajtur qëndrimi më korrekt dhe më profesional, dhe sikur të mos ishin disa nga mediat, sigurisht që ngjarja dhe qëndrimi ndaj saj nuk do të ishin ndotur nga lloj-lloj marrëzish që janë shkruar. SHCBA ka marrë menjëherë përsipër atë që i takonte, sepse nuk mundej dot Policia e Shtetit të hetonte diçka që kishte ardhur si rezultat i veprimit ekstrem të një punonjësi. Autori jo vetëm u ndalua menjëherë, por doli dhe përpara gjyqit.

Atëherë çfarë kërkojnë këta? Duan të vazhdojnë ciklin e revolucionit imagjinar që ka dy vite që rrotullohet në rradaken e Metës e të Saliut? Mua më vjen keq për Bashën dhe është tjetër rast që provon se Basha është një lider pa pikë karakteri, sepse e di që ai s’ka lidhje me këtë që ndodh, por ai do duhet të dilte e të thoshte se këto janë të papranueshme dhe kjo nuk është rruga për të ardhur në pushtet. Por si gjithmonë ai është i papranishëm në momentin e duhur, në vendin e duhur, për të thënë gjënë e duhur. Kjo që ndodh nuk ka lidhje fare me zemëratat, por një tjetër akt i degradimit të Ilir Metës e Sali Berishës. Këta të dy janë pas asaj që ndodh në rrugë. Këtë e dinë edhe peshqit e Liqenit Artificial. Jam i bindur që të gjithë shqiptarët e dinë këtë, të majtë e të djathtë”, deklaroi kryeministri Rama.

“Humbi jetën aksidentalisht”, çorbë që e bënë meidat…

Por kot nuk quhet Edi Rama! Nuk i vjen as turp për VKM-në e firmosur nga vetë ai për pensionin e veçantë 61 mijë lekë për babain e 25-vjeçarit të vrarë nga policia ku përcaktohet se Klodian Rasha “humbi jetën aksidentalisht”.

Kjo është një nga çorbat që keni bërë ju, tha ai para gazetarëve dhe duke harruar se nuk po flet në Asamblenë e PS dhe se në VKM saktësohet se “humbi jetën aksidentalisht”, ai thotë se qeveria nuk merr atributet e gjykatës dhe se nuk ka përcaktuar përfundimisht përcaktimin e vrasjes.

”Kjo është një nga çorbat që keni bërë ju. Një çorbë që ka trazuar shpirtërat e njerëzve për shkak se kam marrë rolin e Gjykatës, është përdorur një term juridik teknik për të përcaktuar arsyen e dhënies së pensionit. Dhe është thënë aksidentalisht nga veprimi i forcave policore,” tha Edi Rama dhe vazhdoi me fjalë dhe fjali të pakuptimta zor se i kupton njeri:

“Personi që humbi jetën tragjikisht nuk ka qenë objekt i ndonjë misioni policor. Por ka humbur jetën në kushte të një përplasje aksidentale. Kjo nuk përcakton që personi është vrarë me një plumb nga qielli, përcakton se humbja e jetës është i një përplasje aksidentale. Në këtë përplasje aksidentale që nuk ka qenë pjesë e një operacioni, zinxhiri komande, se ka raste kur Policia në një operacion një person i rrezikshëm duhet asgjësuar. Ky nuk është rast. Për të mos marrë përsipër të bëjmë Gjykatën, por për të dhënë atë kontribut që është solidaritet me familjen, që është shprehje e motivit pse dhe si ne e kuptojmë këtë detyrë, kur themi nuk do jeshë kurrë vetëm në problemin e hallin që të ka zënë,” tha ky adhurues i Konicës që përveç se ngatërron fjalët e shkruara me dorën e vetë, ngatërron dhe idetë që është e paqartë se të kujt mund të jenë kur janë kaq idiote. Gjithsesi, dolën nga goja e plotëfuqishmit të Shqipërisë:

“Nuk ka lidhje me aksidentin e vendosjes së një fjale përfundimtare mbi çështjen gjyqësore. Kjo është e gjitha. Po të ishte aksident, po të kishte humbur jetën se i erdhi një plumb rikoshet nga një operacion policor aty afër nuk do merrte pension. S’ka qenë rasti për t’i dhënë pension. Në këtë rast është pjesëmarrja e shtetit dhe qeverisë në këtë dhimbje, që filloi me një ndjesë, dhe e cila vazhdon me një hap tjetër, që nuk e sjell në jetë më fatkeqin, por sidoqoftë shpreh në mënyrë simbolike për të qenë pranë prinëdrve të tij.”

Dhe, avokatinë për Drejtorin e Përgjithshëm të Policisë së Shtetit, Ardi Veliu, e çoi deri në fund edhe kur gazetarët i sollën në vëmendje rastin e dhunës ndaj një 15-vjeçari dhe nuk kërkoi falje por i bëri biografinë e nënës së tij aktore. Madje akuzoi gazetarin se gënjeu edhe pse debati i shëmtuar në komisionin parlamentar u trasnmetua “live”:

“Gënjeve kur the Ardi Veliu nuk kërkoi falje, ai është shprehur gabim në një bisedë në komision parlamentar duke shkëmbyer aty me deputetët një bisedë, pa qenë i vetëdijshëm që ishte duke u filmuar, imagjino çfarë thotë Meta e Saliu kur takohen në Lalëz për minorenët që duhen hedhur në zjarr, imagjino të filmohen,” tha Edi Rama aspak i qetësuar edhe kur përfundoi vizitën e radhës në familjen e Klodian Rashës të vrarë nga policia. Dhe ky kryeministër i pagabueshëm, për protestat akuzoi analistët që, sipas tij janë aq të pandjeshëm.

“Unë mendoj që është fatkeqësi e madhe që njerëz me eksperiencë, me prani publike, me përgjegjësi publike, si ata të cilët ashtuquhen analistë apo opinionistë që shfaqen në ekrane apo shprehin opionionet nëpër portale, të jenë kaq të pandjeshëm, kaq të ndërkryer ndaj qeverisë dhe kaq të mbushur me një ndjenjë hakmarrjeje për 1001 arsyet e tyre sa të mos e ngrenë zërin për një fakt tmerrësisht të trishtueshëm që është shfaqur këto ditë. Abuzimi me të miturit, dhe ta interpretosh këtë shfaqje si shpërthimin e një zemërate popullore, revoltë gjeniune, si shembull për t’u marrë sa i përket vandalizmave do të thotë që vërtet duhet të ndjehemi të alarmuar. Jo unë si kryeministër. Qeveritë shkojnë dhe vijnë, kryeministrat shkojnë e vijnë, po në fund të ditës askush nuk lind kryeministër, e askush nuk vdes i tillë.

Para e pas se të jesh kryeministër, je qytetar i këtij vendi, je prind, je edhe pasues i të tjerëve, që kanë qenë para teje si banorë të këtij vendi. Është përtej skandalozes është një turp i pashoq, të shikosh njerëz që mund të kenë të gjitha arsyet e tyre, më pëlqen mua apo jo, jam apo s’jam dakord të kenë të gjithë angazhimin e tyre kundër qeverisë, po të arrijnë deri në këtë pikë dhe të riabuzojnë të miturit duke i përdorur si argument për të vazhduar të pikturojnë një panoramë të një revolucioni latent që kanë kohë që e nxisin është rënie në një nivel, që nga pikëpamja humane është katastrofë. Nuk gjej fjalë të arsyetoj analistë që predikojnë dhunën, argumentojnë dobinë që ka për shoqërinë djegia e objekteve të pronës publike. Ç’problem ka se po thyejnë e djegin, kjo s është problem, përkundrazi pak po bëjnë. Kjo është fundi! Nuk e kam gjetur as tek filozofët e teoricienët e ekstremit të majtë në Francë, që në protestat ‘denbabaden’ të Francës të nxjerrin një fjalë për ta amnistuar dhunën,” tha njeriu i ndjeshëm ekselent, që detyroi mbi 300 mijë shqiptarë ta braktisin Shqipërinë dhe kur i mbledhen 300 shqiptarë e protestojnë akuzon analistët. Dhe sërish merr në gojë abuzimin me fëmijët, duke harruar se ishin fëmijët ata që i vunë flakën institucioneve më 21 Janar 2011 kur ai ishte në krye të protestave opozitare.

Por, i pagabueshmi hakërrehet mbi analistët, se çfarë i thonë këta të rinjëve të Shqipërisë, e çfarë u ka thënë vetë ai dhe vazhdon e u thotë, pak rëndësi ka.

“Çfarë janë këta, kush është shqetësimi sot i imi, meqë më pyetët dhe po flas i zhveshur nga pozicioni. Është si mund të arrihet deri këtu. ‘Boco Haram’ është një organizatë famë keqe që sot ka marrë stafetën e të tjera forcave që në histori kanë shfrytëzuar të miturit. Si mund të ndodhë kjo në Shqipëri? Ata fëmijë nuk janë të vëtëdijshmë për atë që bëjnë, nuk janë të motivuar nga politika në qeniene e tyre. Ata janë të abuzuar, janë të përdorur si mish për top. Si mundem unë të them që ata minorenë, që vandalizuan selinë e PS në Shkodër janë fajtorë. Ata s’janë as fajtorë as të vetëdijshëm. Janë fëmijë nga familje që kanë problematikat e tyre, por ata që janë pas tyre janë kriminelë dhe ata që e teorizojnë nëpër televizorë, debate komente këtë konvulsion të stimuluar me fëmijët, bëjnë një akt kriminal, moralisht kriminal.

Si mundet, çfarë i thonë këta të rinjve të Shqipërisë, çfarë i thonë popullit: Dilni e bëni kështu se kjo është rruga për të përmbysur regjimin? Cilin regjim? Mund të ketë 1001 arsye për t’u kontestuar, po bëhet me protestë paqësore dhe me votë. Kthehuni pak në histori. Cilat protesta kanë funksionuar? Protestat e dhunshme apo paqësore? Po të ishte sikundër teorizohen, do ishin të gjithë studentët e gjimnazistët, si me armët kimike. Nuk kanë djegur asnjë fije bari, nuk kanë qëlluar asnjë guralec, kanë dalë në protestë dhe e kanë kthyer pas një nismë që pa ata mund të kishte shkuar në drejtim tjetër. Pse? Sepse kjo qeveri mund të ketë shumë të meta, por nuk është shurdhe dhe e pavëmendshme ndaj protestës. E njëjta gjë me studentët. Vetëdija ime dhe qasja jonë është të jemi të vëmendshëm të dëgjojmë të reflektojmë dhe qeveria nuk është e fortë kur thotë kam të drejtë, por kur bën gjënë e drejtë.”