Presidenti Trump firmos paketën e ndihmës ekonomike
Presidenti i Shteteve të Bashkuara, Donald Trump, firmosi paketën e ndihmës ekonomike për të prekurit nga pandemia e koronavirusit dhe ligjin për shpenzimet qeveritare.
Presidenti Trump, fillimisht, ka refuzuar të firmos, duke thënë se dëshiron t’iu japë njerëzve ndihma më të mëdha.
Paketa e ndihmës, me vlerë 900 miliardë dollarë, është miratuar javën e kaluar nga Kongresi, pas disa muajsh negociata. Ajo është pjesë e një pakete shpenzimesh prej 2.3 trilionë dollarësh, që përfshin edhe 1.4 trilion për shpenzimet normale të qeverisë federale.
Mosfirmosja e ligjit deri në mesnatën e së hënës ka rrezikuar edhe mbylljen e pjesshme të Qeverisë amerikane.
Ndërkohë rreth 14 milionë amerikanë të papunë janë përballur me humbje të pagesave të ndihmës. Këto përfitime tani do të rikthehen.
Presidenti Trump tha se e firmos ligjin me një mesazh të fortë, që ia bën të qartë Kongresit se gjërat e kota duhet të hiqen.
Paketa e ndihmës ekonomike ka kaluar Dhomën e Përfaqësuesve dhe Senatin të hënën e kaluar, por, një ditë më vonë, Presidenti Trump ka kërcënuar me veto, duke e përshkruar paketën si “të turpshme”. Paketa parashikon një pagesë prej 600 dollarësh për amerikanët që fitojnë më pak se 75.000 dollarë në vit.
Presidenti Trump tha se dëshiron që amerikanët të marrin nga 2.000 dollarë, por republikanët në Kongres, raporton RFE, kanë refuzuar të pajtohen për këtë ndryshim.
Përveç pagesave që synojnë t’i ndihmojnë individët amerikanë, paketa përfshin edhe mbështetje për pagat e bizneseve të vogla, fonde për të ndihmuar rihapjen e shkollave dhe ndihmë për industrinë e transportit dhe shpërndarjen e vaksinave kundër koronavirusit.
