Ekzekutimi i Vajdin Lamajt, Gjykata e Prizrenit miraton ekstradimin e Indrit Taullait
Gjykata e Prizrenit ka miratuar ekstradimin e Indrit Taullait i akuzuar nga SPAK për vrasjen e Klodian Saliut dhe i përfshirë në ekzekutimin e Vajdin Lamajt, ngjarje të ndodhura në 26 dhe 27 shkurt të vitit 2005.
Ndërsa për Plarent Dervishajn, kunatin e ish-kreut të bandës së Durrësit Lulzim Berisha, BW raporton se nuk ka ende një përgjigje nga autoritetet në Dubai.
Për këto dy ekzekutime akuzohen edhe Lulzim Berisha, Emiljano Shullazi, Viktor Imeraj, Luftar Reci dhe Indrit Rusi.
Ndryshe ish-anëtari i “Bandës së Durrësit”, Indrit Taullai, u arrestua rreth një muaj më parë në Kosovë.
Ai ka qenë i dënuar me 25 vite burg, pasi u arrestua si pjesë “Bandës së Durrësit”, të cilët akuzohen për një sërë vrasjesh për hakmarrje ndaj grupeve kriminale rivale.
Indrit Taullai ishte liruar nga burgu nga një vendim i Gjykatës së Lartë, pasi vuante nga sëmundje e rëndë, ku argumentohej se duhej të trajtohej në kushte spitalore, jashtë ambienteve të burgut. Pak orë pas vendimit të Gjykatës së Lartë, e cila pranoi më 29 qershor 2017 kërkesën për lirimin me kusht të Indrit Taullait, ky i fundit ka lënë qelitë e burgut.
“Banda e Durrësit”, ku ai bënte pjesë ka nisur të veprojë në qytetin bregdetar prej vitit 1998, kur Lulzim Berisha, i cili gjithashtu është në liri me kusht, në bashkëpunim me Plaurent Dervishaj, Adriatik Colin, Klodian Saliun dhe Ilir Xhungën vranë me armë zjarri Dritan Sallakun.
Seriali i vrasjeve vijoi edhe në pranverën e vitit 2006, ku u arrestuan shtatë persona, mes të cilëve katër të akuzuar si vrasës me pagesë. Njëri prej tyre, Adriatik Coli u pendua dhe bashkëpunoi me drejtësinë pas riatdhesimit nga Italia. Edhe ky i fundit përfitoi lirinë në vitin 2015.
