Kosova siguron 500 mijë vaksina Anticovid nga Pfizer dhe 360 mijë nga COVAX

Në kuadër të angazhimeve konkrete për sigurimin e vaksinave kundër COVID-19, ministri i Shëndetësisë, Armend Zemaj bëri të ditur se Kosova ka siguruar 500 mijë vaksina nga kompania Pfizer.

Konfirmimin për sigurimin e këtyre vaksinave na e kanë dhënë përfaqësuesit e Pfizer gjatë një takimi virtual i cili u mbajt sot .

“Siç e kemi bërë të ditur edhe më herët, Ministria e Shëndetësisë ka qenë e angazhuar prej muajsh në shumë drejtime për sigurimin e vaksinës kundër COVID-19, me qëllim të përmbushjes së obligimeve që kemi ndaj qytetarëve dhe ruajtjes së shëndetit publik të tyre. Qeveria e Kosovës dhe Ministria e Shëndetësisë mbesin të përkushtuara që qytetarëve tanë t’u sigurojmë mbrojtje përmes vaksinimit gjithëpërfshirës kundër COVID-19”, thuhet përmes një njoftimi.

Krahas kësaj, ai tha se Kosova do të marr nga mekanizimi COVAX edhe 360.000 vaksina falas për 20 për qind të popullatës.

“Vaksina do të sigurohen për të gjitha grupet e popullatës që duhet të mbulohen me vaksinim sipas projeksioneve të IKSHPK-së. Vaksina kundër COVID-19, do t’u jepet falas qytetarëve të vendit tonë,” thuhet në njoftimin e ministrit të Shëndetësisë, Armend Zemaj.