Në zonat e përmbytura, Basha: Sot s’është koha për politikë, të ndihmohen qytetarët!

Pas vizitës që u bëri banorëve të zonave të përmbytura në Shkodër, Lezhë dhe Fushë Krujë të cilët prej ditësh përballen me vështirësi për shkak të reshjeve të mëdha, Kryetari i Partisës Demokratike, Lulzim Basha, tha se sot nuk është koha për politikë, por është koha t’u vihet në ndihmë qytetarëve, me ushqime, ujë të pijshëm e medikamente në këto kohë të vështira që po përballen si me dëmet nga moti, kriza ekonomike ashtu edhe nga pandemia.

“Kriza ekonomike ua ka bërë të pamundur krijimin e rezervave ushqimore apo të kursimeve monetare. Fshatra të tërë janë të izoluar prej ditësh pa asnjë komunikim me qendrat administrative, spitalet dhe tregjet. Ndërsa ndihma nga qeveria ka munguar,” konstaton Lulzim Basha pas vizitës së zonave të përmbytura duke reaguar përmes rrjetit social Facebook.

“Sot nuk është koha për politikë, por është koha t’u vihet në ndihmë qytetarëve, me ushqime, ujë të pijshëm e medikamente pasi shumë prej tyre kanë dhe probleme shëndetësore,” thekson lideri i opozitës duke shtuar se duhet menaxhim i situatës dhe jo propagandë boshe, ndërsa shqiptarët vuajnë çdo ditë e më shumë.

Për fat të keq, qeverisë nuk i bëhet vonë për qytetarët, thekson Kryetari i PD duke shtuar se në ditën më të keqe është shtruar në darka në restorantët më luksozë në Dubai.

Pas situatës në konstatuar në terren, Kryetari i Partisë Demokratike, Lulzim Basha u zotua se PD do të bëjë çdo gjë që është e mundur për t’iu dhënë ndihmë, do të përballen me këtë situatë bashkë dhe duke dalë prej saj bashkë ndërsa përfundon:

“Pas 25 prillit, të gjithë bashkë do të ndërtojmë një qeveri që kujdeset për qytetarët dhe jo per vete. Do të sjellim shpresë për të gjithë dhe ndryshimin që presin të gjithë shqiptarët.”