Nis vaksinimi Anticovid në Shqipëri, personi i parë nuk ishte Edi Rama por…

Ashtu siç u paralajmërua në orën 15:00 ka nis vaksinimi dhe Shefja e Spitalit Infektiv, Najada Çomo, është personi i parë që është vaksinuar kundër COVID-19 në Shqipëri.

I dyti në radhë, siç tha, në emër të sensibilizimit, vaksinën Anticovid e mori Kryeministri Edi Rama, i pasuar nga mjeku infeksionist Pëllumb Pipero dhe mjeku Tritan Kalo.

Pas vaksinimit Kryeministri Edi Rama tha se është një lehtësim i madh për të dhe se shqiptarët nuk do presin më me ankth.

“Çdo gjë në rregull. Asnjë problem. Mendoj se është një ditë fantastike për faktin se jemi çliruar nga një barrë shumë e madhe. Barra e përgjegjësisë për të mos lejuar që shqiptarët të mbeteshin në rradhë dhe për të mundësuar, pavarësisht se, Shqipëria dhe rajoni ku ne bëjmë pjesë, nuk u përfshi në skemën e furnizimit të menjëhershëm, të fillonte me sa më pak diferencë kohe nga ata të cilët kanë dhe gurin dhe arrën në dorë dhe i marrin vendimet dhe bëjnë dhe furnizimet. Ky spostim fare pak javor në kohë është një lehtësim i madh për mua. Tani shqiptarët mund të presin pa ankthin a do vijë a s’do vijë vaksina,” tha Edi Rama duke përsëritur se vaksina nuk është e detyrueshme por e këshillueshme dhe duhet të çlirohen nga marrëzitë dhe helmet e burimeve të konspiracionit ndërsa e përfundoi me batuta të lodhura meqë ka kohë që nuk rri me njerëz që nuk i servilosen:

“Vaksina nuk i bën ilirët vikingë. Ilirët mbeten ilirë, dhe po ashtu është e sigurt që nuk futet çip në trup për të përgjuar thashethemet e kafeneve.”

Ndryshe, të parët që do marrin vaksinën Pfizer/BioNTech janë mjekët, më pas të moshuarit. Kjo është doza e parë e vaksinës, pasi Edi Rama dhe të tjerët, do të duhet të bëjnë dhe dozën e dytë pas 21 ditësh.

Aktualisht Shqipëria ka 975 doza të vaksinës Pfizer/BioNTech. Vaksina në Shqipëri është falas dhe jo e detyrueshme, dhe qendra e parë e vaksinimit është hapur në stadiumin “Air Albania’’.