Zyrtare/ Papa Françesku vaksinohet kundër COVID-19

Papa Françesku dhe paraardhësi i tij, Benedikti XVI, kanë marrë vaksinën kundër COVID-19, njoftoi sot Vatikani. Sipas programit të vaksinimit të Vatikanit që nisi dje, doza e parë e vaksinës COVID-19 i është dhënë Papa Françeskut, tha zëdhënësi Matteo Bruni.

Dje ishte raportuar se Papa Françesku kishte marrë vaksinën, por zyrtarët nuk pranuan të konfirmojnë lajmin. Ish-udhëheqësi i Selisë së Shenjtë, Papa Benedikti, 93 vjeç, u vaksinua sot në mëngjes.

Nuk është njoftuar se me cilën vaksinë janë imunizuar, raporton RFE, por Papa, 84 vjeç, ka folur më herët për rëndësinë e vaksinimit në luftën kundër COVID-19. Në një intervistë të transmetuar gjatë fundjavës, Papa Françesku u bëri thirrje njerëzve që të bënin vaksinën.

Ndryshe, në mesazhin e tij të Krishtlindjes, Papa Françesku bëri thirrje që vaksinat të vihen në dispozicion në të gjithë globin, jo vetëm në vendet e pasura.