Shpërthen ndaj Metës, Rama: Boll e përdore Presidencën si thes për atë farë LSI-je!

Kryeministri Edi Rama ka reaguar ashpër pas një mesazhi të Presidentit të Republikës, Ilir Meta, duke e akuzuar sërish se po përdor Presidencën për Lidhjen Socialiste për Integrim.

“Ke të drejtë Ilir, Shqipëria nuk futet dot në thes, shumë mirë e paske thënë! Prandaj boll e përdore Presidencën e Republikës si thes për atë farë LSI-je dhe Presidentin e Shqipërisë si gojën e shqyer të atij thesi,” thekson Edi Rama në reagimin e tij përmes rrjetit social Twitter.

Ndryshe, ky reagim i Kryeministrit Edi Rama vjen pas një mesazhi të Presidentit të Republikës, Ilir Meta, në prag të zgjedhjeve të 25 Prillit se Shqipëria nuk futet dot në thes nga një çetë me banditë, oligarkë dhe arrogantë.

“Shqipëria nuk futet dot në thes nga një çetë me banditë, oligarkë dhe arrogantë. HARROJENI! Më 25 prill 2021, Shqipëria në dorë të shqiptarëve!”