“Dashuria me Erdoganin”, Rama: S’jemi të detyruar të presim BE-në, kemi Turqinë…
Që nuk ka lidhje me politikën ka kohë që e ka dëshmuar, por Kryeministri Edi Rama sot e konfirmoi se nuk ka lidhje as me ekonominë. Aq më shumë kur në Tiranë u lodhi njerëzve veshët me Shengenin Ballkanin sot në Korçë foli ndoshta edhe pa e kuptuar, se njëra ndër viktimat e këtij projekti, industria e mishit, tha se shpëtimin e gjen te Turqia!
Gjatë një bashkëbisedimi me qytetarët në Korçë askush nuk e kuptoi pse u fut në këto ujëra, kur dihet qartë angazhimi i tij në projektin serb të Shengenit Ballkanik, me të cilin industria e mishit falimenton. Por, Kryeministri i Facebookut duke sulmuar politikën e Bashkimit Evropian dhe jo atë që vetë ideon sot tha se ne nuk jemi të detyruar të presim tregun e BE domosdoshmërisht, sepse ka tregje të tjera, ku është e mundur që produktet tona të mishit të dalin në tregje të mëdha, që nga Turqia në Lindjen e Mesme, e deri tutje”
“Na duhet një durim i madh për të kuptuar që proceset e shtetbërjes në të gjitha hallkat dhe ngritjes së zinxhirit të institucioneve, që të bëjnë punën e tyre, janë procese që kërkojnë kohën e tyre. Në 3-4 vitet e ardhshme është e mundur që ne të kemi dalje në treg, por ne nuk jemi të detyruar të presim tregun e BE domosdoshmërisht, sepse ka tregje të tjera. Është e mundur që produktet tona të mishit të dalin në tregje të mëdha në Lindje, që nga Turqia në Lindjen e Mesme, e deri tutje. Kështu që, besoj se ka shumë hapësirë, që puna juaj në këtë sektor, të jetë një revolucion. Janë ndërtuar shembujt që tregojnë se nëse bën gjërat e duhura këtu bën sukses, si një aktor në një treg të madh. Nëse pret që shteti t’i bëjë të gjitha, nuk bën dot sukses, ka marrë fund.”
Meqë nuk ka lidhje as me politikën dhe as me ekonominë, kjo ide pa lidhje për një treg që po e prishë vetë dhe i jep njëkohësisht zgjidhje, mund të arsyetohet vetëm me “dashurinë” që ka shprehur ndaj Erdoganit.
Dhe, kjo dashuri u shfaq edhe kur u foli korçarëve për sistemin shëndetësor, e për ta zhdukë korrupsionin mori si shembull sistemin shëndetësor të Turqisë, i cili nga një sistem i korruptuar është bërë ekselent falë dhënies me PPP.
“Ne jemi në fazën që hapim tjetër kapitull me Shëndetësinë. Mjekë e infermierë janë të motivuar njësoj si në struktura private duhet të heqim dorë nga pagat uniforme, por të paguajmë sipas performancës, nëse duam që fenomenin e Tires që përfaqëson një sëmundje brenda sistemit shëndetësor, e kot ta mohojmë nuk mund të shërohet duke prit që njerëzit të denoncojnë apo duke e marrë Tiren e çuar në burg. Duke krijuar nga ana tjetër motivimin brenda sistemit.
Sistemi shëndetësor turk që para reformës ka qenë një nga më të dobëtit dhe korruptuarit, sot është një nga sistemet më ekselente. E ka bazën e suksesit tek PPP. Spitalet publike turke menaxhohen nga kompani private, e dini ju? Jo se ato caktojnë mjekët, por pjesa e kujdesit shëndetësor është e varur nga shteti, godina ngrohja ftohja, kateringu, çarcafët, aparaturat është komplet privat. Këto i ndërtojnë dhe administrojnë. Janë në thonjëza “oligarkët” që i ndërtojnë dhe administrojnë dhe shteti ju paguan atyre në vite kontributin për investimin, ndërsa mjekët janë të paguar nga shteti. Shefi i pavijonit dhe drejtuesi i përgjithshëm i trupës janë njësoj si të ishin në spital privat,” tha Kryeministri duke harruar atë që është më thelbësore: Atje kryeministër nuk ishte dhe nuk është Edi Rama!
