Apeli i Ambasadores SHBA, Rama: Nuk do ngremë salla torturash. Zbatojmë ligjin!

Apeli nga Ambasada e SHBA për largimin e kriminelëve nga listat zgjedhore nuk ka munguar as këtë radhë në prag të zgjedhjeve parlamentare, ashtu siç nuk ka munguar as shpërfillja e Kryetarit të Partisë Socialiste, Edi Rama, ndaj këtyre thirrjeve i cili pas mbledhjes me drejtuesit e PS në qarqe tha se kjo parti do zbatohet ligji dhe se kush gënjen në vetëdeklarim ka përgjegjësi individuale, dhe nuk e kanë ndërmend të ngenë salla torturash.

“Ne kemi ligjin, zbatojmë ligjin. Përgjegjësia e kujtdo që gënjen në vetëdeklarim është përgjegjësi individuale jo partie. Partitë nuk janë drejtori policie, verifikojnë në bazë të ligjit dhe sipas ligjit i kemi bërë verifikimet gjithmonë. Skemi ndërmend të ngremë salla torturash në selitë e partive nëse dikush fsheh diçka. Ne shohim dokumentacionin në dispozicion.”

Kryeministri u pyet edhe për emra të veçantë, si Gledion Rahovica që ka kaluar nga LSI tek PS, por theksoi se emrat janë çështje e procesit dhe lista përfundimtare e kandidatëve për deputetë për 25 prillin do të jetë ajo që do të deklarohet kur të çohet në KQZ.

“Nuk bëj komente për emra të veçantë sepse emrat e veçantë janë çështje e procesit të vazhdon. Në fund do të dalë lista duke u bazuar dhe tek puna që secili bën deri tani që flasim. Duke u bazuar tek një skuadër, kështu që është e kotë të merremi me emra të veçantë.”

Ndërkohë i pyetur se ku do të kandidojë vetë ai për zgjedhjet e 25 prillit, Edi Rama ishte i prerë.

“Ky është problemi më i vogël, por është e sigurt që Vlorën unë nuk e lë dhe Durrësit i kam një borxh!”

Ndryshe, në konferencën “Kostot e Demokracisë II; Paratë në Politikë dhe Integriteti Zgjedhor”, Ambasadorja e SHBA, Yuri Kim, u bëri thirrje liderëve të partive politike që të largohen kriminelët nga lista zgjedhore dhe të bëjnë transparencë financimet.