Programi për Shëndetësi i PD, Koduzi: Ja si do ti kthejmë dinjitetin qytetarit dhe personelit mjekësor!

Programi për Shëndetësi i Partisë Demokratike u shpalos nga ekspertët Gazment Koduzi dhe Mirela Tabaku ku u dhanë detajet mbi kthimin e dinjitetit të qytetarit dhe personelit mjekësor.

“Çdo qytetar do të ketë kartën e tij të sigurimeve shëndetësore dhe me të në dorë do të vizitohet tek mjekut që ai dëshiron, ndërsa fatura do të paguhet nga sigurimet shëndetësore,” tha Dr.Gazment Koduzi duke shtuar se asnjë qytetar shqiptar nuk do të paguajë nga xhepi për analizat, diagnostikimin dhe mjekimin e tij: pacienti zgjedh ofruesin, paraja ndjek pacientin.

Nuk do të ketë më blerje të barnave nga xhepi sepse bari nuk është në listën e rimbursimit apo nuk mund t’i blejnë për shkak të pamundësisë financiare.

“Çdo pacient do të marrë me rimbursim barnat që nevojiten për kurimin e sëmundjes bazuar në protokollet më të mira botërore të mjekimit,” duke u zotuar në reformimin e sektorit farmaceutik.

Kthimi i dinjitetit të personelit mjekësor do të filloj me rritjen e rrogës së mjekëve në 1200 Euro dhe infermierëve në 700 Euro.

“Ne do të motivojmë mjekët e rinj të specializohen, duke I paguar të gjithë specializantët me 950 Euro ne muaj dhe do të zerojmë kuotën e studimit prej 115000 Lek te re janë vit, si dhe duke lënë të hapur punësimin e tyre pas specializimit bazuar në konkurimin e lirë pranë çdo spitali,” tha Dr. Koduzi duke përfunduar:

“Pas 8 vitesh dështime të Ramës, pas 8 vitesh që Rama e ka lënë pas dore sistemin tonë shëndetësor. Pas 8 vitesh që Rama ju ka lënë pas dore juve, është koha t’i themi Ramës lamtumirë! Ne do ta sjellim ndryshimin që është kaq i domosdoshëm në Shqipëri.”

PREZANTIMI I PROGRAMIT PËR SHËNDETËSINË NGA GAZMENT KODUZI

Jam shumë krenar që jam sot këtu.

Për herë të parë, prej shumë kohësh, shqiptarët po e ndjejnë ndryshimin që po vjen.

Kushdo që e dëgjoi Lulzim Bashën tani, e kupton plotësisht se Shqipëria ka më në fund një plan.

Javën e kaluar ne pamë që Shqipëria ka një plan ekonomik dhe sot Basha zbuloi se Shqipëria ka një plan për shëndetësinë.

Jo një plan dosido, por një plan të vërtetë, të menduar mirë, me angazhime specifike që ndryshe nga Rama, ne do t’i përmbushim.

Jo premtime boshe.

Jo ëndrra që nuk do të bëhen kurrë realitet.

Thjesht një plan që do të ofrohet dhe ekzekutohet nga Basha dhe qeveria e tij menjëherë pas zgjedhjeve.

Dua të ndalem me ju në disa nga pikat kryesore në këtë plan:

1. Ne do t’i kthejmë dinjitetin qytetarëve: çdo qytetar do të ketë kartën e tij të sigurimeve shëndetësore dhe me të në dorë do të vizitohet tek mjekut që ai dëshiron, ndërsa fatura do të paguhet nga sigurimet shëndetësore. Asnjë qytetar shqiptar nuk do të paguajë nga xhepi për analizat, diagnostikimin dhe mjekimin e tij. Ne do të ndjekim parimin: pacienti zgjedh ofruesin, paraja ndjek pacientin.

2. Nuk do të ketë më blerje të barnave nga xhepi sepse bari nuk është në listën e rimbursimit apo nuk mund t’i blejnë për shkak të pamundësisë financiare. çdo pacient do të marrë me rimbursim barnat që nevojiten për kurimin e sëmundjes bazuar në protokollet më të mira botërore të mjekimit.

Ne do të reformojmë sektorin farmaceutik me qëllim që çdo shqiptar të marrë barna të cilësisë së njëjtë me një qytetar të Bashkimit Europian apo të vendeve të zhvilluara ekonomike.

3. Ne do t’i kthejmë dinjitetin personelit mjekësor, mjekë dhe infermierë. Ne do të rrisim rrogën e mjekëve në 1200 Euro dhe infermierëve në 700 Euro.

Ne do të frenojmë largimin e bluzave të bardha nga Shqipëria, për arsye ekonomike apo për karrierë profesionale.

Ne do të rrisim numrin e studentëve që do të studiojnë për mjekësi, qoftë përmes rritjes së kapaciteteve aktuale të Fakultetit të Mjekësisë, apo hapjes së një fakulteti të ri publik.

Ne do të motivojmë mjekët e rinj të specializohen, duke I paguar të gjithë specializantët me 950 Euro ne muaj dhe do të zerojmë kuotën e studimit prej 115000 Lek te re janë vit, si dhe duke lënë të hapur punësimin e tyre pas specializimit bazuar në konkurimin e lirë pranë çdo spitali.

4. Ne do të investojmë në shëndetin publik, me fokus përmirësimin e shëndetit të popullatës, kapjen në kohë të sëmundjeve onkologjike, si dhe përballimin e epidemive të ndryshme, duke reformuar Institutin e Shëndetit Publik dhe investuar në kapacitetet njerëzore dhe infrastrukturë.

Miqtë e mi!

Pas 8 vitesh dështime të Ramës, pas 8 vitesh që Rama e ka lënë pas dore sistemin tonë shëndetësor. Pas 8 vitesh që Rama ju ka lënë pas dore juve, është koha t’i themi Ramës lamtumirë!

Ne do ta sjellim ndryshimin që është kaq i domosdoshëm në Shqipëri.

Basha do ta sjellë këtë ndryshim.

Vetëm me Bashën, Shqipëria fiton!​

PREZANTIMI I PROGRAMIT PËR SHËNDETËSINË NGA EKSPERTJA E PD, MIRELA TABAKU

Të dashur miq!

Të gjithë e kemi parë impaktin që solli në opinionin publik plani ynë ekonomik.

Njerëzit presin që ne të ofrojmë ndryshimin që i duhet kaq shumë vendit.

Pas 8 vitesh dështim total, pas 8 vitesh fjalësh boshe, pas 8 vitesh që njerëzit dëgjojnë Ramën të flasë dhe nuk i besojnë asnjë fjalë që thotë, është koha që Rama të ikë.

Sot Lulzim Basha do të prezantojë shkurtimisht për ju planin e tij se si Shqipëria dhe shqiptarët do të fitojnë nga plani ynë i shëndetësisë

Është një plan gjithëpërfshirës.

Është plan serioz.

Është plan i zbatueshëm.

Një plan që ne të gjithë synojmë ta zbatojmë menjëherë pas zgjedhjeve të 25 prillit.

Miqtë e mi!

Ju të gjithë e shihni se çfarë ka bërë Rama me sistemin tonë shëndetësor në këto 8 vite.

• Shqipëria ka nivelin më të ulur në rajon sa i takon shpenzimeve publike në shëndetësinë shprehur si % e Prodhimit të Brendshëm Bruto

• Ndërkohë, Shqipëria ka nivelin më të lartë në rajon të pagesave nën dorë si % e shpenzimeve për shërbimet shëndetësore.

• Familjet shqiptare kanë buxhetin më të vogël për familje në rajon por, shpenzimet për shëndetësinë i kanë më të lartat.

• Në tregun shqiptar qarkullojnë barna me cilësi dhe origjinë të dyshimtë??

• Shqipëria ka numrin më të ulur të numrit të mjekëve për 1000 banorë në rajon, dhe ka një keqmenaxhim të shpërndarjes së burimeve njerëzore.

• Pagat e mjekëve dhe infermiereve në Shqipëri deri në 2020 ishin më të ulëtat në rajon.

• Shqipëria ka numrin rekord të mjekëve të larguar.

• Shqipëria ka vdekshmërinë më të lartë foshnjore në rajon, një tregues i rëndësishëm i kujdesit shëndetësor

Situata e COVID 19 tregoi më së miri gjendjen reale të sistemit tonë shëndetësor duke bërë gjithkënd të ndjeshëm ndaj këtij realiteti të së ashtuquajturës mjekësi falas.

Qytetarët shqiptarë nuk marrin shërbimin e duhur shëndetësor, shumë prej tyre nuk janë në gjendje të përballojnë çmimet e barnave që ju duhen për të mbrojtur shëndetin.

Ne kemi punuar bashkë me kryetarin e PD për një program që do të garantojë një të ardhme më të mirë për Shqipërinë dhe qytetarët e saj. Ne kemi punuar bashkë për të ndërtuar plane pune që do të shpëtojnë jetë, përmirësojnë jetët tuaja, jetët e mjekëve dhe infermierëve tanë të shkëlqyer dhe kushtet e punës së tyre.

Ata janë heronjtë tanë, ndaj ata meritojnë shumë më shumë.

Unë e njoh Lulzim Bashën dhe mund ta them me besim të plotë se ai është njeriu i duhur në kohën e duhur për të sjellë ndryshimin që i duhet kaq shumë vendit tonë.

Ne mund ta themi me bindje të plotë: ne kemi besim se Lulzim Basha do ta udhëheqë vendin tonë drejt një të ardhmeje më të mirë, një ekonomie më të mirë, një  qeverie që kujdeset për qytetarët e saj.​