Ambasada e Kosovës në Jerusalem, BE: Vendim fatkeq!

Bashkimi Evropian, BE, ka shprehur keqardhje për vendimin e Kosovës që të hapë Ambasadën në Jerusalem, qytet të cilin BE e konsideron me status të pazgjidhur.

Zëdhënësi i BE, Peter Stano, tha sot se Brukseli pret nga Kosova që të veprojë në bazë të deklarimeve për integrimet evropiane si qëllim strategjik.

“Në përgjithësi është gjithmonë e mirëseardhur kur parterët tanë të jashtëm normalizojnë raportet mes tyre. Por kur është fjala e hapjes së ambasadës në Jerusalem, ky është një vendim për keqardhje i Kosovës sepse e largon Kosovën nga qëndrimet e BE-së për statusin e Jerusalemit. Të gjitha ambasadat e vendeve anëtare të BE-së dhe delegacioni i BE-së janë në Tel Aviv dhe kjo është në përputhje me rezolutën e Kombeve të Bashkuara dhe vendimet e Këshillit të BE-së. Statusi i Jerusalemit si kryeqytet i të dyja shteteve është qëndrim i BE-së, i cili nuk ka ndryshuar,” tha Stano ndërsa i pyetur se çfarë të drejte ka BE të ftojë Kosovën të mos hapë apo të hapë diku ambasadë, kur Kosova nuk ka raporte diplomatike me Bashkimin Evropian, dhe nuk ka delegacion diplomatik në BE, ai përsëriti qëndrimin se për shkak të mosnjohjes nga pesë shtetet anëtare, nuk ka unitet rreth statusit të Kosovës, prandaj raportet me Kosovën janë çfarë janë dhe kontaktet si vend partner janë të rregullta.

“Ne nuk kërkojmë nga Kosova të bëjë apo të mos bëjë diçka. Por themi se nëse pretendoni se keni qëllim strategjik integrimin në BE, atëherë ekziston korniza në bazë të së cilës duhet të veproni. Pra, vetëm themi se ju duhet të veproni në bazë të asaj që vetë keni deklaruar,” tha Zëdhënësi i BE duke shtuar se perspektiva evropiane e Kosovës është reale e jo abstrakte. Dhe, si zyrtar evropian Peter Stano foli për ndihmën financiare të deritashme të BE-së në Kosovë që nga viti 2007 e deri më sot, ku sipas tij janë rreth 2 miliardë euro për të ndihmuar Kosovën, për të përmirësuar jetën e kosovarëve, infrastrukturën etj.

“Nuk besoj se ndokush tjetër ka investuar aq shumë në Kosovë”.

Në pyetjen se pse BE nuk ka qenë kaq kritike ndaj Serbisë e cila shumë rrallë mbështet qëndrimet e Bashkimin Evropian në politikën e jashtme, zëdhënësi i BE-së tha se Serbia nuk e ka hapur ambasadën në Jerusalem edhe pse e ka marrë obligim ndaj Shteteve të Bashkuara. Dhe jo vetëm kaq! Në rastin e Serbisë, tha ai, ajo duhet gradualisht të përshtatë politikën e saj me BE-në.

Ndryshe, dje Kosova dhe Izraeli kanë formalizuar marrëdhëniet diplomatike. Në një ceremoni virtuale të mbajtur të hënën, ministrja në detyrë e Punëve të Jashtme dhe Diasporës së Kosovës Meliza Haradinaj-Stublla dhe ministri i Punëve të Jashtme të Izraelit, Gabriel Ashkenazi kanë nënshkruar dokumentin, në të cilin thuhet se të dyja shtetet vendosin marrëdhënie diplomatike, me qëllim që të rrisin bashkëpunimin në shumë sfera. Ministri izraelit, Ashkenazi tha se të dyja shtetet po bëjnë histori./RFE/