Njohja nga Izraeli, Vjosa Osmani: Kosova forcoi pozicionin ndërkombëtar

Me njohjen nga Izraeli, Kosova e ka forcuar edhe më tej pozicionin ndërkombëtar, tha U.D. Presidentja Vjosa Osmani në një bisedë telefonike me kryetarin e Parlamentit të Izrealit – Knesset, Yariv Levin, një ditë pas vendosjes së marrëdhënieve diplomatike Kosovë-Izrael duke shfaqur shpresën se veprimin e këtij shteti ta ndjekin edhe shtetet e tjera që ende nuk e kanë njohur Kosovën.

Vjosa Osmani e ka falënderuar z.Levin për vendimin e shtetit të tij për ta njohur shtetin e Kosovës, duke shfaqur shpresën se hapja e këtij kapitulli të ri do të jetë mundësi e mirë për intensifikimin e marrëdhënieve në shumë sfera. Në këtë kontekst, marrëdhëniet me Izraelin i ka konsideruar të rëndësisë strategjike.

Në cilësinë e Kryetares së Parlamentit të Kosovës, Vjosa Osmani ka theksuar rëndësinë e fillimit të bashkëpunimit ndërparlamentar duke pas parasysh faktin se legjislativi kosovar tashmë ka krijuar Grupin e Miqësisë me Izraelin.

Me këtë rast, Presidetnja Osmani siguroi Yariv Levin se Kosova do ta mbështes çdo iniciativë globale kundër antisemitizmit.

“Antisemitizmi nuk ka gjetur vend në Kosovë. Në këtë plan ne do të punojmë edhe me rininë kosovare lidhur me edukimin e tyre për luftën kundër antisemitizmit,” tha Presidentja e Kosovës ndërsa Kryetari i Parlamentit të Izraelit, Yariv Levin, në fund të kësaj bisede telefonike e ka ftuar Vjosa Osmanin për një vizitë në Izrael në një kohë të përshtatshme për të dy palët.